Ferill 513. máls. Aðrar útgáfur af skjalinu: PDF - Word Perfect.

---

157. löggjafarþing 2025–2026.
Þingskjal 1139  —  513. mál.
2. umræða.

Nefndarálit

um frumvarp til laga um þjónustuveitendur hópfjármögnunar fyrir fyrirtæki.

Frá meiri hluta efnahags- og viðskiptanefndar.

    Nefndin hefur fjallað um málið og fengið á sinn fund gest frá fjármála- og efnahagsráðuneyti.
    Nefndinni bárust engar umsagnir.
    Með frumvarpinu er kveðið á um setningu nýrra laga um þjónustuveitendur fyrir hópfjármögnun fyrir fyrirtæki. Með þeim er innleitt í íslenskan rétt ákvæði reglugerðar Evrópuþingsins og ráðsins (ESB) 2020/1503 frá 7. október 2020 um evrópska þjónustuveitendur hópfjármögnunar fyrir fyrirtæki og um breytingu á reglugerð (ESB) 2017/1129 og tilskipun (ESB) 2019/1937. Notast hefur verið við skammstöfunina ECSP sem heiti á þessari reglugerð.
    Samkvæmt ECSP er þjónustuveitandi hópfjármögnunar lögaðili sem veitir hópfjármögnunarþjónustu, þ.e. leiðir saman fjárfesta og verkefniseiganda sem leitast eftir því að fjármagna atvinnurekstur í gegnum hópfjármögnunarvettvang. Á Íslandi er ekki að finna regluverk um þjónustuveitendur hópfjármögnunar fyrir fyrirtæki. Með innleiðingu ECSP verður starfsemin því starfsleyfisskyld með tilheyrandi kröfum sem frumvarpið kveður á um.
    Meiri hlutinn telur jákvætt að settur sé skýr rammi um hópfjármögnunarviðskipti. Með þessu móti er stefnt að því að auðvelda umfangsmikla hópfjármögnunarþjónustu á innri markaði Evrópusambandsins og auka þannig aðgang frumkvöðla, sprotafyrirtækja, fyrirtækja í stækkunarferli og lítilla og meðalstórra fyrirtækja að fjármagni.
    Að framangreindu virtu leggur meiri hlutinn til að frumvarpið verði samþykkt óbreytt.

Alþingi, 28. apríl 2026.

Arna Lára Jónsdóttir, form.	Pawel Bartoszek, frsm.		Ragna Sigurðardóttir.
Ásthildur Lóa Þórsdóttir.		Sigmundur Ernir Rúnarsson.