Ferill 156. máls. Aðrar útgáfur af skjalinu: PDF - Word Perfect.

---

157. löggjafarþing 2025–2026.
Þingskjal 228  —  156. mál.
Síðari umræða.

Nefndarálit

um tillögu til þingsályktunar um fullgildingu uppfærðs fríverslunarsamnings milli EFTA-ríkjanna og Úkraínu, samnings um efnahagslega samvinnu milli EFTA-ríkjanna og Malasíu og fríverslunarsamnings milli EFTA-ríkjanna og Kósovós.

Frá utanríkismálanefnd.

    Nefndin hefur fjallað um málið og fengið á sinn fund gesti frá utanríkisráðuneyti.
    Með tillögunni er leitað heimildar Alþingis til fullgildingar á uppfærðum fríverslunarsamningi milli EFTA-ríkjanna og Úkraínu sem undirritaður var í Kyjív 8. apríl 2025, samningi um efnahagslega samvinnu milli EFTA-ríkjanna og Malasíu sem undirritaður var í Tromsö 23. júní 2025 og fríverslunarsamningi milli EFTA-ríkjanna og Lýðveldisins Kósovós sem undirritaður var í Davos 22. janúar 2025.
    Í greinargerð með tillögunni kemur fram að hinn uppfærði samningur við Úkraínu komi í stað eldri samnings frá 2012 og undirstriki áframhaldandi pólitískan og efnahagslegan stuðning Íslands við Úkraínu. Með honum er kveðið skýrar á um vernd hugverka, rafræn viðskipti, lítil og meðalstór fyrirtæki og sjálfbær viðskipti. Þá eru ákvæði samningsins frá 2012 uppfærð til samræmis við nýja tíma og þróun á sviði alþjóðaviðskipta. Helstu útflutningsvörur Íslands til Úkraínu séu sjávarafurðir og eldisfiskur og frá Úkraínu séu einkum fluttar inn vörur úr viði, fatnaður, vélar og tæki. Þá kemur fram að samningurinn við Malasíu sé hefðbundinn fríverslunarsamningur sem kveði á um niðurfellingu tolla fyrir allar helstu útflutningsafurðir Íslands. Í dag séu fiskimjöl og lýsi helstu útflutningsvörur en að iðnaðarvörur, vélar og tæki séu helstu innflutningsvörurnar. Auk hefðbundinna ákvæða fríverslunarsamninga lýsa samningsaðilar yfir vilja til að auka samstarf sín á milli, m.a. á sviði orkuskipta og aðgerða í loftslagsmálum. Þá kemur fram að fríverslunarsamningurinn við Lýðveldið Kósovó kveði m.a. á um niðurfellingu tolla fyrir allar helstu útflutningsafurðir Íslands og að vöruviðskipti við ríkið hafi verið óveruleg undanfarin ár. Loks kemur fram að í heild hafi vöruútflutningur til landanna þriggja numið ríflega 5,3 milljörðum kr. að meðaltali á ári og þjónustuútflutningur 2,9 milljörðum kr.
    Að mati nefndarinnar fela samningar þessir í sér aukin tækifæri fyrir íslensk fyrirtæki til útflutnings og styrkir m.a. samkeppnisstöðu þeirra, fjárfesta og einstaklinga í Suðaustur-Asíu. Þá fagnar nefndin uppfærslu samnings við Úkraínu sem er jákvætt skref í áframhaldandi stuðningi Íslands við Úkraínu.
    Nefndin leggur til að tillagan verði samþykkt.

Alþingi, 20. október 2025.

Pawel Bartoszek, form.	Sigurður Helgi Pálmason, frsm.		Dagbjört Hákonardóttir.
Diljá Mist Einarsdóttir.	Sigmar Guðmundsson.		Sigurður Ingi Jóhannsson.
Sverrir Bergmann Magnússon.		Þórdís Kolbrún Reykfjörð Gylfadóttir.