Ferill 107. máls. Aðrar útgáfur af skjalinu: PDF - Word Perfect.

---

157. löggjafarþing 2025–2026.

Prentað upp.

Þingskjal 282  —  107. mál.

2. umræða.

Nefndarálit með breytingartillögu

um frumvarp til laga um breytingu á lögum um fjöleignarhús, nr. 26/1994 (dýrahald).

Frá 2. minni hluta velferðarnefndar.

    Annar minni hluti leggst ekki gegn markmiði frumvarpsins um aukið hagræði í þágu eigenda hunda og katta sem flytja í fjöleignarhús. 2. minni hluti telur þó að með frumvarpinu sé gengið of langt að þessu leyti með því að réttur annarra eigenda sé fyrir borð borinn. Um leið víkur frumvarpið frá meginreglum laga um fjöleignarhús um tilskilinn meiri hluta eigenda við töku ákvarðana um hunda- og kattahald (d-liður 2. gr. frumvarpsins) og meginreglum laganna um úrræði einstakra eigenda (ákvæði sem breytir 55. gr.).
    Óumdeilt er að ekki ráða allir við að búa í nábýli við hunda og ketti af margvíslegum ástæðum. Í frumvarpinu er þetta viðurkennt. Tilraun til þess að koma til móts við þessa eigendur er bæði ómarkviss (tilvísanir til afar matskenndra aðstæðna) og verulegt frávik frá meginreglum laganna sem áratugareynsla er komin á.
    Annar minni hluti telur brýnt að tryggja eigendum íbúða í fjöleignarhúsi þann möguleika að koma í veg fyrir að hundar og kettir búi í húsinu. Í anda meðalhófs er því lagt til að með samþykki allra eigenda verði hægt að þinglýsa kvöð um slíkt á hverja séreign hússins sem haldist þrátt fyrir framsal eignarréttinda. Þannig gætu t.d. verktakar gert ráð fyrir einhverjum slíkum byggingum strax á byggingarstigi ef eftirspurn er eftir slíku. Íbúar í eldri húsum sem allir hafa sömu hagsmuni að þessu leyti gætu líka nýtt sér þennan möguleika. Ekki er ástæða til að ætla að þessu úrræði yrði beitt nema að vandlega athuguðu máli, m.a. með tilliti til hagsmuna af framtíðarsölumöguleikum sem gætu minnkað eða aukist, eftir atvikum. Mikilvægt er að samningsfrelsi manna að þessu leyti verði tryggt með þeirri breytingu sem lögð er til með frumvarpinu.
    Rétt er að gera áfram ráð fyrir að húsfélag setji reglur um dýrahald og þar með skorður á dýrahald sem eftir sem áður séu eðlilegar, málefnalegar og á jafnræði reistar.
    Að lokum er rétt að taka tillit til ábendinga Húseigendafélagsins sem bendir á í umsögn um málið að vikið sé frá meginreglu 55. gr. laganna með því að frumvarpið geri bara ráð fyrir því að húsfélagið geti beitt ákvæðinu en ekki einstakir eigendur einnig. Þannig sviptir frumvarpið einstaka eigendur rétti til þess að grípa til aðgerða en leggur skyldu á húsfélagið. Hér er lagt til að ekki verði hróflað við valdheimildum sem 55. gr. laganna býður upp á.

    Annar minni hluti leggur til að frumvarpið verði samþykkt með eftirfarandi

BREYTINGU:

     1.      1. gr. orðist svo:
              33. gr. e laganna fellur brott, ásamt fyrirsögn.
     2.      Á eftir 1. gr. komi ný grein, svohljóðandi:
                 Eftirfarandi breytingar verða á 33. gr. f laganna:
                  a.      1., 3. og 4. mgr. falla brott.
                  b.      2. mgr. orðast svo:
                      Með samþykki allra eigenda er hægt að þinglýsa kvöð á hverja séreign fjöleignarhúss um bann við hunda- og/eða kattahaldi í húsinu sem verður ekki aflýst nema með samþykki allra eigenda.
     3.      Við 2. gr.
                  a.      D-liður falli brott.
                  b.      Í stað orðanna „húsfélagið með samþykki ²/ ₃ hluta eigenda“ í 1. efnismálsl. e-liðar komi: húsfélag með ákvörðun skv. D-lið 1. mgr. 41. gr.
                  c.      Í stað orðanna „húsfélagið beiti úrræðum skv. 55. gr.“ í 3. efnismálsl. e-liðar komi: að úrræðum skv. 55. gr. verði beitt.
     4.      3. gr. falli brott.
     5.      4. gr. orðist svo:
                 5. tölul. 3. mgr. 74. gr. laganna orðast svo: Reglur um hunda- og/eða kattahald.

Alþingi, 5. nóvember 2025.

Sigríður Á. Andersen.