Ferill 585. máls. Aðrar útgáfur af skjalinu: PDF - Word Perfect.
157. löggjafarþing 2025–2026.
Þingskjal 991 — 585. mál.
Beiðni um skýrslu
frá félags- og húsnæðismálaráðherra um framkvæmd tillagna OECD um úrbætur á regluverki í byggingariðnaði.
Frá Þórdísi Kolbrúnu Reykfjörð Gylfadóttur, Guðlaugi Þór Þórðarsyni,
Þórarni Inga Péturssyni, Vilhjálmi Árnasyni, Hildi Sverrisdóttur, Jóni Gunnarssyni, Diljá Mist Einarsdóttur, Jóni Pétri Zimsen, Ólafi Adolfssyni, Njáli Trausta Friðbertssyni og Stefáni Vagni Stefánssyni.
Með vísan til 54. gr. stjórnarskrárinnar og 54. gr. laga um þingsköp Alþingis er þess óskað að atvinnuvegaráðherra flytji Alþingi skýrslu um framkvæmd tillagna OECD frá árinu 2020 um úrbætur á regluverki í byggingariðnaði. Í skýrslunni komi fram:
a. lýsing á hverri og einni tillögu samkvæmt framsetningu í skýrslu OECD,
b. staða innleiðingar; hvaða skref hafi verið tekin við að innleiða viðkomandi tillögu og hvort tillagan hafi verið innleidd að fullu,
c. frekari upplýsingar ef innleiðingu er ekki lokið; hverjar séu ástæður þess að tillagan hafi ekki verið innleidd og hvort innleiðing hennar sé fyrirhuguð,
d. tímasett áætlun um næstu skref,
e. hvort mælikvarðar og árangursmat séu til staðar sem sýna fram á áhrif innleiðingarinnar á samkeppnishæfni og efnahagslegan ávinning.
Greinargerð.
„Árið 2020 stóð OECD að mati á regluverki á Íslandi með það að markmiði að greina tækifæri til að bæta samkeppnishæfni og draga úr óþarfa regluverki, í samstarfi við íslensk stjórnvöld. Niðurstöðurnar voru birtar í ítarlegri skýrslu sem var gerð opinber og lagði grunn að umbótastefnu í tilteknum atvinnugreinum, sérstaklega byggingariðnaði og ferðaþjónustu.
Í þessari skýrslu voru settar fram alls 316 tillögur til úrbóta í byggingariðnaði og 121 tillaga í ferðaþjónustu. Þessar tillögur taka til fjölbreyttra þátta, svo sem einföldunar leyfisveitinga, skýrari ábyrgðarskiptingar milli stofnana, skráningar og útgáfu gagna, tæknilegra reglna og faglegra viðmiðana.
Skýrslubeiðni þessi miðar að því að tryggja gagnsæi um framgang þessara umbótatillagna og að Alþingi hafi yfir að ráða skýrum upplýsingum um framkvæmd þeirra. Með hliðsjón af umfangi og mikilvægi tillagnanna er brýnt að unnið sé markvisst að innleiðingu þeirra og að skýrt yfirlit sé fyrirliggjandi um núverandi stöðu.
Óskað er eftir því að ráðherra leggi fram skýrslu fyrir Alþingi þar sem fjallað verði um stöðu innleiðingar hverrar og einnar tillögu sem kemur fram í skýrslu OECD, hvaða skref hafi verið tekin við að innleiða viðkomandi tillögu og hvort tillagan hafi verið innleidd að fullu. Þá er óskað eftir upplýsingum um það ef innleiðingu er ekki lokið og hverjar ástæðurnar fyrir því eru. Loks er óskað eftir upplýsingum um hvort innleiðing á tillögum sé fyrirhuguð auk tímasettrar áætlunar um næstu skref.
Þar sem miklar vonir voru bundnar við að tillögur OECD gætu stuðlað að hagkvæmni og skilvirkni í tveimur mikilvægum atvinnugreinum er mikilvægt að Alþingi hafi yfirsýn um afdrif þessara tillagna. Skýrslan mun jafnframt veita mikilvægar upplýsingar til stefnumótunar og pólitískrar umræðu um regluumhverfi atvinnulífsins.“
