[prenta uppsett í dálka] 120. fundur
Pétur H. Blöndal:
Herra forseti. Ég vil þakka hv. fyrirspyrjanda þessa fyrirspurn sem vekur athygli á mjög brýnum vanda. Nú er það þannig að fátækt er vissulega afstæð. Það sem kallað er ríkidæmi í Indónesíu er fátækt á Íslandi. Það sem kallað var ríkidæmi fyrir 100 árum á Íslandi er fátækt í dag þannig að fátækt er afstæð í tíma og rúmi.
Ég er sammála því að laun ættu að vera miklu hærri á Íslandi og til þess þurfum við að örva atvinnulífið. Við þurfum að keyra atvinnulífið áfram með því að auka fjárfestingu í atvinnulífinu. Það er brýnasta verkefnið. Við þurfum að auka atvinnuna því mikið af þessari fátækt sem við upplifum í dag er vegna atvinnuleysis og vegna þess að fólkið fær ekki peningana í launaumslaginu.
