Tómas Ingi Olrich:
Virðulegi forseti. Ég vil einungis taka undir þau orð hæstv. menntmrh. að það sé mjög æskilegt að Póstur og sími taki að sér dreifingu útvarpsefnis og minni á að í sambandi við störf útvarpslaganefndar fyrir nokkrum árum var lögð vinna í það með aðstoð Háskóla Íslands að varpa ljósi á þá kosti sem væru fólgnir í því annars vegar að byggja upp dreifikerfi Ríkisútvarpsins sérstakega, ellegar þá að nýta það ljósleiðarakerfi sem fyrir er í landinu. Sú skýrsla varpaði ljósi á það að stofnkostnaður væri svipaður en rekstrarkostnaður mun minni ef ljósleiðarakerfið væri notað almennt fyrir dreifingu útvarps- og sjónvarpsefnis. Sá sparnaður sem menn komust að niðurstöðu um í þessari skýrslu nam um 400 millj. þannig að það styður mjög þá yfirlýsingu sem hæstv. menntmrh. kom með í ræðu sinni að þetta væri æskileg lausn.