Fjármálaráðherra (Friðrik Sophusson) (andsvar):
Virðulegi forseti. Ég skildi dóm undirréttarins í Reykjavík í SR-málinu þannig að það byggðist á jafnræðisreglunni og því sem kom ekki fram í ræðu hv. þm. að í biðlaunaréttinum felst forgangur til starfs hjá ríkinu ef staða er lögð niður. Þetta er ekki eingöngu biðlaunaréttur heldur líka réttur til þess að vera ráðinn innan ákveðins frests í tiltekin störf, þ.e. þetta er forgangsréttarákvæði. Hins vegar kannast ég ekki við að það hafi komið fram í neinum dómi að það sé álit dómara að biðlaunarétturinn sé eignarréttindi sem séu lögvarin af stjórnarskránni og þess vegna skuli koma bætur fyrir ef hann er tekinn af.