Samgönguráðherra (Halldór Blöndal):
Herra forseti. Það hefur ekki verið gerð úttekt á áhrifum þess á ferðaþjónustuna að Íslendingar gerist aðilar að svonefndu Schengen-samkomulagi. Í umræðum um sama mál fyrir nokkru í norska Stórþinginu kemur fram að samband veitinga- og gistihúsa í Noregi telji aðild nauðsynlega til að ferðaþjónustan þar í landi skaðist ekki, enda sé líklegt að erlendir ferðaskipuleggjendur muni sneiða hjá löndum sem verða með hindranir af einhverju tagi við landamæri.
Hugmyndin að baki Schengen-samkomulagi er sú að auðvelda fólki ferðalög og helst hún í hendur við eitt helsta baráttumál ferðaþjónustunnar sem er að auðvelda ferðalög og draga úr takmörkunum. Á móti kemur að ekki hefur verið metinn til fulls sá kostnaður sem af samkomulaginu hlýst. Þann kostnað er ferðaþjónustan ekki reiðubúin til að taka á sig.