[prenta uppsett í dálka] 78. fundur, 125. lþ.
Guðjón A. Kristjánsson (andsvar):
Herra forseti. Ég vil aðeins gera eina athugasemd og í því sambandi langar mig að vitna í texta sem ég er með undir höndum og er tilvitnun í samantekt sem barst frá Verðlagsstofu alveg nýverið inn á fund í úrskurðarnefnd, en þar segir m.a., með leyfi forseta:
,,Tveir verðheimar fyrir sambærilega vöru er að stærstum hluta afleiðing vankanta í fiskveiðistjórnarkerfinu en ekki hlutaskiptakerfinu, sem þó má endurbæta talsvert. Návígisvandinn virðist enn vera til staðar og fullyrðingar um frjálsan samningsrétt sjómanna stangast verulega á við það sem kemur fram í einkaviðtölum við þá. Fulltrúar sjómanna og útvegsmanna geta því spurt sig þeirrar spurningar hvort raunhæfar framtíðarlausnir byggist á áframhaldandi aðgerðum úrskurðarnefndar, Kvótaþings og Verðlagsstofu eða hvort stokka þurfi spilin upp á nýtt.``
Þetta held ég að sé bara ágætisábending í lok umræðunnar og ég vil beina því til hæstv. sjútvrh. að hann verði sér úti um þennan texta, hann á ábyggilega aðgang að honum, og lesi það sem sett var fram á þessum fundi. Ég vil ekki lesa meira úr viðkomandi plaggi.
