Halldór Blöndal (andsvar):
Herra forseti. Það er komið fram sem skiptir máli. Hv. þm. lítur svo á að sem þingmaður Reykvíkinga beri henni að gæta þess að störf verði ekki flutt út á land. Það er ágætt að þetta komi fram. Þessi hv. þm. er einn af áhrifamestu þingmönnum Samfylkingarinnar. Ég hef orðið var við að hún er talsmaður Samfylkingarinnar í mörgum málum. Ég hef líka orðið var við að þingmenn Samfylkingarinnar hlusta mjög mikið á það sem þessi hv. þm. segir. Þess vegna er mjög þarft og gott að þetta sjónarmið þingmannsins komi fram að það er sérstakt hlutverk þingmanna Samfylkingarinnar í Reykjavík að passa upp á að störf flytjist ekki út á land.
Ég vil svo bara til gamans og þingmanninum til upplýsingar benda á að í Búðardal er bæði dýralæknir og héraðslæknir.