Ögmundur Jónasson:
Herra forseti. Á undanförnum árum hafa oft staðið um það deilur, stundum mjög hatrammar, hvort flytja beri starfsemi á vegum hins opinbera frá Reykjavík út á landsbyggðina. Oft hefur mjög óhöndulega tekist til í þessu efni og nægir þar að nefna deilurnar í kringum flutning á Landmælingum ríkisins frá Reykjavík til Akraness á sínum tíma og nú síðast flutning Byggðastofnunar.
Vinstri hreyfingin -- grænt framboð hefur mjög eindregið verið á því að stefna beri að því að styrkja opinbera starfsemi utan Reykjavíkursvæðisins, á landsbyggðinni. Hér er dæmi um stofnun eða hluta af stofnun, starfsemi sem er að verða til, sem mikilvægt er að fundinn verði staður utan Reykjavíkursvæðisins, í þessu tilviki á Akureyri. Mér heyrðist á svari hæstv. fjmrh. að staðið verði við þau fyrirheit sem gefin hafa verið og mér finnst það vera fagnaðarefni.