Þórunn Sveinbjarnardóttir:
Hæstv. forseti. Eins og fram kom í máli hv. þm. Tómasar Inga Olrichs rita ég undir nál. hv. utanrmn. í þessu máli. Ég er komin hingað upp í þeim tilgangi að benda á nauðsyn þess að samhliða því að tilskipun Evrópusambandsins um þetta efni verði leidd í lög á Íslandi fari fram nauðsynleg vinna í umhvrn. og samið verði frv. um einhvers konar mengunarbótalöggjöf. Þar er mikil vinna óunnin. Ég hygg að um það sé full samstaða að mjög gott væri ef sú vinna gæti haldist í hendur, að fá þessi mál hér til umfjöllunar og að umhvrn. hefji þá vinnu sem þarf að vinna vegna mengunarbótalöggjafar. Þar erum við því miður þó nokkuð á eftir og þyrftum að bretta upp ermarnar.