Hjálmar Árnason:
Herra forseti. Samgöngur eru undirstaða í nútímasamfélagi. Ekki síst skipta flugsamgöngur miklu máli fyrir þjóð eins og Íslendinga, eyland þar sem flugsamgöngur í nútímasamfélagi gegna jafnmikilvægu hlutverki og raun ber vitni. Það snýr í rauninni að sjálfstæði þjóðarinnar.
Hinir hræðilegu atburðir þann 11. september sl. settu þennan þátt samgöngumála í verulegt uppnám hér sem annars staðar. Þess vegna er það skylda ríkisvaldsins að grípa þar inn í og þess vegna styður þingflokkur Framsfl. frv. sem hér er til umræðu.