Kristján L. Möller (andsvar):
Herra forseti. Ég tók eftir því að hv. þm. Pétur H. Blöndal hóf ræðu sína, eins og hann gerði líka við síðustu fjárlög, á því að honum liði eins og hann væri staddur á hluthafafundi í meðalstóru bandarísku fyrirtæki. Ég tók það þannig að hann væri þá hluthafi.
Því langar mig til að spyrja hv. þm. eftir þessa ræðu um agaleysi í ríkisfjármálum og annað, eins og hér hefur komið fram: Telur hv. þm. Pétur H. Blöndal að hluthafafundur í þessu meðalstóra bandaríska fyrirtæki mundi endurráða þá stjórn sem situr núna, þ.e. hæstv. ríkisstjórn, eftir frammistöðu hennar í fjármálum fyrirtækisins, þ.e. ríkissjóðs?