[prenta uppsett í dálka] 36. fundur, 127. lþ.
Menntamálaráðherra (Björn Bjarnason) (andsvar):
Herra forseti. Það er nú svo að það vald verður aldrei tekið af fjárln. sem hún hefur til þess að koma með sínar tillögur. Það er hvorki á mínu valdi né annarra að takmarka vald hennar til þess að gera tillögur við afgreiðslu fjárlagafrv.
Hins vegar er nauðsynlegt og unnið hefur verið að því og ég vona að það sé enn markmið þeirra sem í fjárlaganefndinni starfa, að koma að þessum málum þannig að ákveðnar leikreglur gildi um þessa þætti, m.a. eftirfylgni, einhverjar reglur eins og hæstv. heilbrrh. talaði um þegar hann var formaður fjárln. og að Ríkisendurskoðun kæmi að því. Eins og ég sagði í sambandi safnalöggjöfina, þá eru sett ákveðin markmið. Alþingi samþykkir hvort tveggja, Ríkisendurskoðun heyrir undir Alþingi o.s.frv. þannig að ákveðin eftirfylgni sé varðandi þennan þátt fjárlaganna ekki síður en annarra.
Ég ætla ekki og var ekki að leggja mat á það í sjálfu sér hvort eitt verkefni umfram annað sé betra og hvort spurning sé um einhverja menningarstefnu og vil ekki gagnrýna hv. fjárln. á þeim forsendum. Mér finnst að ekki megi draga þær ályktanir af máli mínu, heldur hitt að verið sé að gera þetta innan ramma sem menn geta fylgst með og sú eftirfylgni hvíli á þessum þáttum ekki síður en öðrum sem gerð er krafa til þegar um opinberar fjárveitingar er að ræða.
