[prenta uppsett í dálka] 36. fundur, 127. lþ.
Arnbjörg Sveinsdóttir (andsvar):
Hæstv. forseti. Ég hlýddi á ræðu hv. þm. og þetta mátti mjög vel skilja á ræðu hennar, m.a. með hennar leikrænu tilburðum sem hæfa henni mjög vel, þegar hún tíundaði ýmis verkefni sem eru í tillögum meiri hluta fjárln. og sem hún taldi að væru mjög ófaglega unnar af hendi meiri hluta fjárln. Það er skoðun hennar.
En ég fullyrði að þau verkefni sem við höfum verið að styðja eru góð menningarverkefni og að þeim hefur verið vel staðið. Meiri hluti fjárln. hefur farið ofan í hvernig að þeim hefði verið staðið fram að þessu og skoðað þær áætlanir að nýjum verkefnum sem hér eru að koma inn.
Af því að hv. þm. nefndi sérstaklega Kjarvalsstofu á Borgarfirði eystra þá hefur þar verið gerð mjög góð áætlun sem liggur fyrir í fjárln. og hefur m.a. verið studd af Kjarvalssafni í Reykjavík. Helst mátti skilja af ræðu hennar að verkefnin væru þeim mun betri eftir því sem þau væru betur studd og hefðu meiri skírskotun til Reykjavíkur, og það er hægt að segja m.a. í þessu verkefni.
