[prenta uppsett í dálka] 36. fundur, 127. lþ.
Kolbrún Halldórsdóttir (andsvar):
Herra forseti. Ég skil ekki hvað hv. þm. gengur til að halda áfram að gera mér upp skoðanir og leggja mér orð í munn. Það eina sem ég fjallaði um í ræðu minni var stefna í úthlutunum til menningarmála.
Það vill svo til, herra forseti, að hæstv. menntmrh. var mér hjartanlega sammála. Hann vitnaði til orða og vinnubragða hæstv. heilbrrh., fyrrum hv. formanns fjárln., og hæstv. menntmrh. bað um að vinnubrögð af því tagi yrðu viðhöfð í þeirri fjárln. sem nú starfar. Ef hv. þm. Arnbjörg Sveinsdóttir getur ekki tekið þeirri gagnrýni og hlustað á orð okkar eins og þau eru meint þá er bara við hana að sakast og leitt fyrir hana.
Varðandi Kjarvalsstofu og öll þau verkefni sem nefnd voru áðan, þá ber ég fulla virðingu fyrir þeim og ítreka að þau eru öll góðra gjalda verð, sannarlega athygliverð og örugglega mjög þörf. En það var verið að tala um vinnubrögð og stefnu.
