Björn Bjarnason:
Herra forseti. Ég þakka hv. fyrirspyrjanda fyrir að vekja máls á þessu máli. Það er alveg á lokastigi og í næstu viku verður væntanlega tilkynnt um það af hálfu Þingvallanefndar og forsrn. að umsóknin varðandi Þingvelli á heimsminjaskránni sé tilbúin og hún verði lögð fram, eins og að er stefnt, fyrir 1. febrúar nk. Það hefur verið unnið að málinu núna á undanförnum vikum, það er komið á lokastig og ég á von á því að í næstu viku verði kynnt af hálfu nefndarinnar og forsrn. að umsóknin verði lögð fram. Þetta mál er, eins og hv. þm. Össur Skarphéðinsson nefndi, á forræði Þingvallanefndar og engin spurning um að það þarf atbeina nefndarinnar til þess að þessi umsókn hafi lögmætt gildi.