Þuríður Backman:
Herra forseti. Það má lesa út úr þessari spurningu að hún eigi e.t.v. fyrst og fremst við um einstaklinga sem nú dveljast í Arnarholti og Kópavogi. Ég tel að upplýsingar sem hæstv. ráðherra gaf hér um að stefnt væri að markvissri búsetuþjónustu séu mjög mikilvægar. Það þarf að koma á samræmdri þjónustu og teymisvinnu við útskrift þeirra einstaklinga sem nú eru í Arnarholti og Kópavogi.
Ég tel að ábyrgð á þessum einstaklingum og rekstrinum sé á hendi hæstv. heilbrrh. Ég tel einnig að því miður verði alltaf til í þjóðfélaginu einstaklingar sem verði svo illa farnir, sama hversu vel við komum fyrir markvissri búsetuþjónustu, að þeir eigi hvergi betur heima en í þjónustukjörnum eins og Kópavogur og Arnarholt eru í dag. Við þurfum að horfa til þess að styrkja þá þjónustu en ekki leggja hana af.