Ungmennavefur Alþingis

Samhliða endurgerð Alþingisvefsins hefur skrifstofa Alþingis látið vinna ungmennavef sem er undirvefur á Alþingisvefnum og sem sérstaklega er ætlaður til að auðvelda ungu fólki að öðlast innsýn í störf og hlutverk Alþingis. Vonir standa til að kennarar geti nýtt vefinn við kennslu nemenda á aldrinum 10 til 15 ára. Rammi ungmennavefsins er hús sem minnir um margt á Alþingishúsið og er skírskotun til þess. Í hverju herbergi þess er gerð grein fyrir atriðum sem snerta sögu eða störf Alþingis. Upplýsingarnar eru settar fram með skýringarmyndum af ýmsu tagi auk þess sem megintextar eru allir vistaðir í bókahillum í sérstöku bókaherbergi. Tillögur að verkefnum fyrir nemendur er að finna á vefnum. Við opnun vefsins er boðið upp á ákveðið grunnefni og umgjörð en ætlunin er að þróa hann og bæta smám saman við fjölbreyttari upplýsingum, verkefnum og þrautum.