störf þingsins.
Hæstv. forseti. Ég ætla að gera að umtalsefni laun aldraðra og öryrkja og setja það í samhengi við kjarasamninga á hinum almenna markaði sem er flestöllum að ljúka. Ég minni á að við þingmenn Samfylkingar fluttum strax við upphaf þessa þings lagafrumvarp í þá veru að aldraðir og öryrkjar skyldu fá sínar greiðslur og sína hækkun afturvirkt eins og allir aðrir.
Mér finnst það óþolandi, virðulegi forseti, og skýri það með rökum hér á eftir, að nokkrir mánuðir skuli falla niður hjá þessum þjóðfélagshópi og finnst það ekki hægt. Þeir eiga auðvitað að fá sínar bætur afturvirkt eins og launþegar í landinu eru að fá þó svo að það séu misjafnar dagsetningar í því eins og við þekkjum. Þess vegna hvet ég til þess að stjórnarliðar taki þetta mál og horfi á það réttsýnum augum og berjist fyrir því að þetta verði gert núna við fjáraukatillögurnar. Ég segi fyrir mitt leyti að að öðru leyti verður stjórnarandstaðan að sjálfsögðu að flytja breytingar um fjáraukatillögur fyrir 2015 með þessari hækkun inni. Það verður að gerast.
Nýlega lauk kjararáð störfum og sagði: Það er búið að leggja meginlínur í kjarasamningum og þær eru orðnar skýrar og þess vegna gat kjararáð tekið sitt mál og úrskurðaði samkvæmt lögum fyrir forseta Íslands, ráðherra, alþingismenn, dómara, forstöðumenn ríkisstofnana, eins og kjararáð á að gera samkvæmt lögum. Þar kemst kjararáð að því að þessir hópar skuli fá afturvirkar greiðslur. Að vísu er deilt um hvers vegna það er 1. mars en ekki 1. maí, ég læt það liggja milli hluta.
Þess vegna segi ég, virðulegi forseti: Allir þeir sem sitja í þessum sal, alþingismenn sem eiga að greiða tillögur um fjáraukatillögur og fjárlög, eiga að sjá sóma sinn í því að við látum þessa þjóðfélagshópa, aldraða og öryrkja, fá sínar hækkanir líka afturvirkt. (Gripið fram í: Heyr, heyr.)
Tengd mál
- Almannatryggingar (hækkun lífeyris í 300 þús. kr.), 3. mál, lagafrumvarp.
- Kjör aldraðra og öryrkja, B533. mál, óundirbúinn fyrirspurnatími.
