Hlutverk forsætisnefndar

Þegar Alþingi kemur saman við þingsetningu á fyrsta fundi hvers kjörtímabils skal kosinn forseti og sex varaforsetar og skipa þeir forsætisnefnd. Varaþingmenn taka ekki sæti í forsætisnefnd í forföllum.

Forsætisnefnd Alþingis á fundi 17. mars 2025: Kolbrún Áslaugar Baldursdóttir, 6. varaforseti, Ingvar Þóroddsson, 2. varaforseti, Eydís Ásbjörnsdóttir, 4. varaforseti, Þórunn Sveinbjarnardóttir, forseti Alþingis, Bryndís Haraldsdóttir, 1. varaforseti, Stefán Vagn Stefánsson, áheyrnarfulltrúi, Karl Gauti Hjaltason, 3. varaforseti, og Hildur Sverrisdóttir, 5. varaforseti.

Ljósmynd / Ljósmyndir Rutar og Silju

Forsætisnefnd skipuleggur þinghaldið, hefur umsjón með alþjóðasamstarfi, fjallar um fjárhagsáætlanir þingsins og setur almennar reglur um rekstur þingsins og stjórnsýslu. Auk þess fjallar nefndin um þau mál sem forseti leggur fyrir hana eða varaforsetar óska að ræða. 

Nánari grein er gerð fyrir verkefnum forsætisnefndar í 2. gr. reglna um störf og starfshætti forsætisnefndar.

Reglur settar af forsætisnefnd

Fundir forsætisnefndar

Forsætisnefnd fundar að jafnaði einu sinni í viku yfir þingtímann og er fastur fundartími nefndarinnar á mánudögum kl. 10:15. Aukafundir eru haldnir eftir þörfum. Auk forseta og varaforseta og eftir atvikum áheyrnarfulltrúa sitja fundi nefndarinnar skrifstofustjóri Alþingis, fjármála- og rekstrarstjóri og ritari forsætisnefndar.

Ákvarðanir forsætisnefndar

Í lokamálslið 6. gr. reglna um störf og starfshætti forsætisnefndar Alþingis segir að birta skuli ákvarðanir úr staðfestum fundargerðum forsætisnefndar, sem upplýsingalög taka til, á vef Alþingis. Þar segir jafnframt að heimilt sé að birta aðrar ákvarðanir forsætisnefndar, svo sem um störf Alþingis og stofnanir þess, samkvæmt ákvörðun nefndarinnar hvert sinn. 

Ákvarðanir forsætisnefndar eru birtar í tímaröð funda, þannig að sú nýjasta er efst. Miðast fyrsta birtingin, sem er neðst á listanum, við þann fund nefndarinnar þar sem reglurnar voru samþykktar, 17. mars 2020.

Ákvarðanir forsætisnefndar 

Forsætisnefnd Alþingis ásamt starfsfólki skrifstofunnar á fundi 17. mars 2025: Frá vinstri: Auður Elva Jónsdóttir, fjármála- og rekstrarstjóri, Kolbrún Áslaugar Baldursdóttir, 6. varaforseti, Eydís Ásbjörnsdóttir, 4. varaforseti, Ingvar Þóroddsson, 2. varaforseti, Ragna Árnadóttir, skrifstofustjóri, Þórunn Sveinbjarnardóttir, forseti Alþingis, Bryndís Haraldsdóttir, 1. varaforseti, Karl Gauti Hjaltason, 3. varaforseti, Hildur Sverrisdóttir, 5. varaforseti, Stefán Vagn Stefánsson, áheyrnarfulltrúi, og Þórhallur Vilhjálmsson, sviðsstjóri laga- og stjórnsýslusviðs.

Ljósmynd / Ljósmyndir Rutar og Silju