Persónuverndarstefna skrifstofu Alþingis

Persónuverndarstefnan veitir upplýsingar um hvernig unnið er með persónuupplýsingar hjá skrifstofu Alþingis og þau réttindi sem einstaklingar hafa og leiðir af persónuverndarlögum. Lög um persónuvernd og vinnslu persónuupplýsinga gilda ekki um vinnslu persónuupplýsinga sem fer fram í tengslum við störf Alþingis, t.d. á þingfundum eða fundum nefnda Alþingis (5. mgr. 4. gr. persónuverndarlaga).

1. Hvað telst vinnsla persónuupplýsinga?

Persónuupplýsingar í skilningi stefnu þessarar eru hvers kyns upplýsingar um persónugreindan eða persónugreinanlegan einstakling, þ.e. upplýsingar sem hægt er að rekja beint eða óbeint til ákveðins einstaklings.

Undir hugtakið vinnslu fellur öll notkun og meðferð persónuupplýsinga, svo sem söfnun, skráning, varðveisla og eyðing.

2. Skrifstofa Alþingis er ábyrgðaraðili að vinnslu persónuupplýsinga

Skrifstofa Alþingis er ábyrgðaraðili að vinnslu persónuupplýsinga sem fram fer af hálfu skrifstofunnar. Skrifstofa Alþingis er opinber aðili sem starfar samkvæmt lögum nr. 90/2018, um persónuvernd og vinnslu persónuupplýsinga. Hennar meginhlutverk er að styðja við starfsemi Alþingis svo að þingið og þingmenn geti sinnt hlutverki sínu samkvæmt stjórnarskrá og lögum.

Skrifstofa Alþingis er til húsa við Kirkjustræti, 101 Reykjavík. Símanúmer er 563 0500 og netfang er althingi[hja]althingi.is.

Nánari upplýsingar um starfsemi skrifstofu Alþingis.

3. Persónuverndarfulltrúi skrifstofu Alþingis

Persónuverndarfulltrúi skrifstofu Alþingis er Laufey Helga Guðmundsdóttir, lögfræðingur á laga- og stjórnsýslusviði. Hægt er að hafa samband við hana í síma 563-0500 eða með því að senda tölvupóst á netfangið personuverndarfulltrui[hjá]althingi.is. Einnig má senda bréf til persónuverndarfulltrúans á heimilisfangið Alþingi, Kirkjustræti, 101 Reykjavík en þá skal umslagið merkt persónuverndarfulltrúa.

Persónuverndarfulltrúi er óháður og sjálfstæður í störfum og hefur eftirlit með vinnslu persónuupplýsinga innan skrifstofu Alþingis.

Erindum og fyrirspurnum um vinnslu persónuupplýsinga hjá skrifstofu Alþingis skal beint til persónuverndarfulltrúa.

4. Hvenær vinnur skrifstofa Alþingis með persónuupplýsingar?

Í flestum tilvikum fær skrifstofa Alþingis persónuupplýsingar beint frá þér þegar:

þú hefur sent fyrirspurn, ábendingu, umsögn eða annað erindi til skrifstofunnar,
þú hefur óskað eftir aðgangi að gögnum samkvæmt upplýsingalögum, stjórnsýslulögum eða persónuverndarlögum,
þú kemur sem gestur í húsakynni þingsins, á fund eða viðburð á vegum Alþingis,
þú hefur óskað eftir því að koma með hóp í heimsókn til þingsins,
þú hefur sótt um starf hjá Alþingi,
samið hefur verið við þig um að sinna ákveðnum verkefnum eða þjónustu fyrir Alþingi,
þú heimsækir vef Alþingis,
þú sækir um afnot af fræðimannsíbúð í Jónshúsi í Kaupmannahöfn,
þú hefur sent Alþingi erindi út af meintu broti alþingismanns á siðareglum fyrir alþingismenn,
þú hefur komið tilkynningu á framfæri á grundvelli viðbragðsáætlunar gegn einelti og áreitni þingmanna,
þú hefur sótt um íslenskan ríkisborgararétt hjá Alþingi.

Skrifstofa Alþingis tekur einnig við persónuupplýsingum frá öðrum en þér í eftirfarandi tilvikum:

frá eftirlitsmyndavélum, ef þú átt leið um þingsvæðið eða húsnæði þingsins,
þegar umsækjandi um starf vísar til þín sem meðmælanda,
hafi Útlendingastofnun vísað umsókn þinni um íslenskan ríkisborgararétt til ákvörðunar Alþingis,
hafir þú verið tilnefndur sem handhafi heiðurslauna listamanna,
hafir þú verið tilnefndur sem handhafi verðlauna Jóns Sigurðssonar forseta,
sért þú maki þingmanns eða varaþingmanns og ert þátttakandi í viðburði á vegum Alþingis.

5. Með hvaða persónuupplýsingar er unnið?

Í flestum tilfellum er unnið með samskiptaupplýsingar um einstaklinga, sem fengnar eru frá þeim sjálfum og Þjóðskrá Íslands, svo sem nafn, heimilisfang, kennitölu, símanúmer, tölvupóstfang o.fl.

Skrifstofa Alþingis skráir einnig aðrar upplýsingar, svo sem samskipti við einstaklinga, efni erindis og öll gögn sem fylgja erindum. Við viðburðahald og móttöku gesta er stundum unnið með upplýsingar um sérfæði gesta og aðgengismál. Við greiðslu reikninga er auk þess unnið með bankaupplýsingar lánardrottna. Við útboð og önnur kaup á grundvelli laga um opinber innkaup er unnið með samskiptaupplýsingar starfsfólks verktaka, upplýsingar um fyrri verk og frammistöðu bjóðenda.

Nánari upplýsingar um hvaða persónuupplýsingar unnið er með í einstökum verkefnum hjá skrifstofu Alþingis má finna í kafla 11.

6. Hvers vegna er heimilt að vinna með persónuupplýsingarnar?

Hlutverk skrifstofu Alþingis er að styðja við starfsemi Alþingis svo að þingið, sem handhafi ríkisvalds, geti sinnt hlutverki sínu samkvæmt stjórnarskrá og lögum. Að jafnaði vinnur skrifstofa Alþingis með persónuupplýsingar á grundvelli stjórnarskrár, laga, þingsályktana eða reglna forsætisnefndar Alþingis sem og í þágu almannahagsmuna.

Þegar unnið er með upplýsingar um verktaka, birgja og aðra sem eiga í viðskiptum við Alþingi vegna kaupa á vöru eða þjónustu er það gert til þess að efna samning við viðkomandi.

Samkvæmt lögum um persónuvernd og vinnslu persónuupplýsinga teljast upplýsingar um stjórnmálaskoðanir fólks viðkvæmar persónuupplýsingar. Meðferð Alþingis á slíkum upplýsingum grundvallast á því að viðkomandi hafi augljóslega sjálfur gert upplýsingar um stjórnmálaskoðanir sínar ljósar, t.d. með því að samþykkja að vera frambjóðandi á framboðslista stjórnmálaflokks fyrir alþingiskosningar.

7. Hver vinnur með persónuupplýsingarnar?

Í flestum tilfellum vinnur starfsfólk skrifstofu Alþingis með persónuupplýsingarnar og þær fara ekki út fyrir Alþingi. Upplýsingalög taka til stjórnsýslu Alþingis. Þinginu gæti því borið að afhenda upplýsingar í ákveðnum tilvikum. Rétt er að geta þess að ógrynni upplýsinga eru birtar opinberlega á vef Alþingis, t.d. um alþingismenn og umsagnaraðila um þingmál.

Skrifstofa Alþingis nýtur stundum utanaðkomandi sérfræðiráðgjafar, svo sem við áætlanagerð, álitsgerðir, ráðningu starfsfólks, fræðslu, öryggisvörslu o.fl. Þegar slíkt á við vinnur sérfræðingur með persónuupplýsingar á grundvelli skriflegs samnings, samkomulags eða skipunarbréfs, sitji hann í starfshóp eða nefnd, og þá einungis eftir fyrirmælum skrifstofu Alþingis.

Í einhverjum tilvikum eru gögn, skjöl og upplýsingar skrifstofu Alþingis geymd hjá öðrum aðilum, stundum vegna lagaskyldu en annars á grundvelli samnings. Sem dæmi er unnið með upplýsingar um starfsfólk og umsækjendur í ráðningar- og launavinnslukerfi Orra sem er á vegum Fjársýslu ríkisins.

Öll gögn og upplýsingar í vörslu skrifstofu Alþingis eru geymd innan Evrópska efnahagssvæðisins.

8. Hvað er gert við persónuupplýsingarnar og hversu lengi eru þær varðveittar?

Þegar upplýsingar berast Alþingi eru þær skráðar í málaskrá (tölvukerfi og skjalasafn). Upplýsingarnar eru síðan notaðar til meðferðar þingmáls eða til að afgreiða mál viðkomandi eða efna skyldu þingsins, hvort sem hún leiðir af lögum eða samningi. Reynt er að tryggja öryggi upplýsinganna eftir fremsta megni og einungis þau hafa aðgang að upplýsingunum sem starfa sinna vegna hafa til þess leyfi.

Alþingi er sem opinber aðili bundið af því að varðveita gögn í þágu almannahagsmuna og hefur til hliðsjónar í störfum sínum lög um opinber skjalasöfn, nr. 77/2014. Öll skjöl og gögn sem Alþingi berast eru varðveitt til frambúðar í skjalasafni þingsins.

9. Öryggi persónuupplýsinga

Skrifstofa Alþingis leggur ríka áherslu á öryggi við vinnslu persónuupplýsinga og hefur í því augnamiði innleitt skipulagslegar og tæknilegar öryggisráðstafanir sem tryggja trúnað, réttleika og tiltækileika gagna og kerfa. Skrifstofan hefur sett sér upplýsingaöryggisstefnu og gert áhættumat og viðeigandi öryggisráðstafanir til að tryggja öryggi kerfa skrifstofunnar.

Til að tryggja öryggi persónuupplýsinga hafa verið innleiddar skipulagslegar og tæknilegar ráðstafanir, eins og:

dulkóðun gagnagrunna, samskipta og gagna við flutning,
aðgangsstýringar þannig að einungis þeir sem þurfa persónuupplýsingar starfa sinna vegna hafi aðgang að þeim,
almennar tölvuvarnir, eins og vírusvarnir og eldveggir, sem eru uppfærðar reglulega,
virkt öryggiseftirlit, svo sem með innri og ytri úttektum og áhættumati, og virk skráning öryggisbresta,
virk fræðsla fyrir starfsfólk um öryggismál,
vefir Alþingis notast undantekningarlaust við SSL-skilríki sem þýðir að öll samskipti eru yfir dulritað burðarlag; það gerir gagnaflutning í gegnum hann öruggari,
notkun virkra öryggisskanna til að tryggja að netþjónar stofnunarinnar séu uppfærðir og rétt upp settir og skýjaþjónustur séu rétt skilgreindar.

Þá hvílir þagnarskylda á öllu starfsfólki samkvæmt lögum um réttindi og skyldur starfsmanna ríkisins, nr. 70/1996.

Ef upp kemur öryggisbrestur þar sem mögulegt er að persónuupplýsingar hafi komist í hendur óviðkomandi aðila eru slík brot meðhöndluð skv. 27. gr. persónuverndarlaga og í samræmi við verklagsreglu þar um.

10. Réttindi þín samkvæmt persónuverndarlöggjöfinni

Samkvæmt persónuverndarlöggjöfinni hefur þú ákveðin réttindi og getur nýtt þér þau með því að senda beiðni á netfangið althingi[hjá]althingi.is eða senda bréf til skrifstofu Alþingis. Þú þarft ekki að borga neitt fyrir að neyta réttinda þinna.

10.1. Aðgangur að eigin persónuupplýsingum

Þú átt rétt á að fá aðgang að og afrit af öllum persónuupplýsingum sem skrifstofa Alþingis vinnur um þig. Í sumum tilvikum geta undantekningar frá réttinum átt við, svo sem vegna réttinda annarra sem vega skulu þyngra, en almenna reglan er sú að veita skuli aðganginn.

Þú getur einnig átt rétt á aðgangi að gögnum um þig samkvæmt stjórnsýslulögum eða upplýsingalögum. Hér getur verið ákveðin skörun á milli lagabálka sem meta þarf hverju sinni.

10.2. Réttur til leiðréttingar

Þú átt rétt á því að fá leiðréttar persónuupplýsingar um þig, sem þú telur rangar. Þó getur skrifstofu Alþingis verið óheimilt að breyta gögnum þar sem hún er bundin af því sem opinber aðili að varðveita gögn í þágu almannahagsmuna. Hins vegar má óska eftir að koma á framfæri leiðréttingu með athugasemd, sem látin er fylgja gögnunum, þegar við á og/eða bæta upplýsingum við þær persónuupplýsingar sem skrifstofan hefur um þig og þú telur ófullnægjandi.

10.3. Réttur til eyðingar/rétturinn til að gleymast

Rétturinn til eyðingar eða rétturinn til að gleymast á ekki við um vinnslu persónuupplýsinga hjá skrifstofu Alþingis þar sem hún er bundin af því sem opinber aðili að varðveita gögn í þágu almannahagsmuna.

10.4. Réttur til takmörkunar á vinnslu

Þú átt rétt á að biðja um að vinnsla sé takmörkuð í ákveðnum tilvikum.

10.5. Réttur til að andmæla vinnslu

Þú átt rétt á að andmæla vinnslu persónuupplýsinga um þig þegar skrifstofa Alþingis vinnur þær á grundvelli almannahagsmuna, þ.e. lagaheimildar, eða við beitingu opinbers valds.

10.6. Réttur til að flytja eigin gögn

Þessi réttur á eingöngu við þegar upplýsingar eru unnar á grundvelli samþykkis eða við gerð samnings. Skrifstofa Alþingis starfar á grundvelli laga og byggir því mjög lítinn hluta sinnar vinnslu á persónuupplýsingum á samþykki eða samningi. Því er ólíklegt að þessi réttur eigi við um þá vinnslu sem fer fram á vegum skrifstofu Alþingis, þar sem hún fer nánast eingöngu fram á grundvelli lagaskyldu eða almannahagsmuna.

10.7. Kvartanir vegna vinnslu persónuupplýsinga

Þau sem telja vinnslu persónuupplýsinga hjá skrifstofu Alþingis brjóta gegn rétti sínum geta sent kvörtun til Persónuverndar.

Hægt er að hafa samband við Persónuvernd með því að senda tölvupóst á netfangið postur[hjá]personuvernd.is eða í síma 510 9600. Stofnunin er til húsa á Laugavegi 166, 4. hæð, 105 Reykjavík. Sjá nánar á vef stofnunarinnar.

11. Nánar um vinnslu persónuupplýsinga hjá skrifstofu Alþingis

11.1. Eftirlitsmyndavélar og rafræn vöktun

Skrifstofa Alþingis annast af öryggisástæðum vöktun við og í húsnæði þingsins með eftirlitsmyndavélum. Myndavélarnar er m.a. að finna við útganga, lyftur, afgreiðslu þingsins, innan og utan húss. Myndefnið er hljóðlaust fyrir utan afgreiðslu Alþingis í Smiðju þar sem samskipti eru tekin upp í hljóði og mynd. Öryggisstjóri Alþingis, þingverðir og lögreglumenn sem starfa á þingsvæðinu geta skoðað myndefni í rauntíma og aftur í tímann. Starfsfólk öryggisgæslu hefur aðgang að myndefni í rauntíma. Öryggisstjóri Alþingis og stjórnendur öryggis- og þjónustudeildar geta tekið afrit af myndefni en gögn úr myndavélakerfi eru eingöngu afhent á grundvelli reglna Persónuverndar um rafræna vöktun. Lögreglustjórinn á höfuðborgarsvæðinu hefur rauntímaaðgang að streymi tiltekinna eftirlitsmyndavéla Alþingis til að stytta viðbragðstíma lögreglu við löggæslu og aðgerðastjórn.

Myndefni úr eftirlitsmyndavélakerfi er safnað og það varðveitt í að hámarki 30 daga, nema í þeim tilfellum þegar nauðsynlegt er að varðveita það lengur, t.d. ef afhenda þarf lögreglu afrit myndefnis.

Heimilt er að vinna framangreindar upplýsingar á grundvelli lögmætra hagsmuna, sbr. 6. tölul. 9. gr. laga nr. 90/2018, um persónuvernd og vinnslu persónuupplýsinga (pvl.), og f-lið 1. mgr. 6. gr. almennu persónuverndarreglugerðarinnar (ESB) 2016/679 (pvrg.).

11.2. Vefur Alþingis

Alþingi er leiðandi stofnun á Íslandi og það er í þágu samfélagsins að lífi og starfi á þingsvæðinu sé miðlað og það skjalfest. Á vegum skrifstofu Alþingis eru m.a. teknar ljósmyndir og myndbönd af störfum þingsins og viðburðum sem haldnir eru í þinginu. Tilgangurinn er annars vegar að nýta efnið til að miðla upplýsingum um störf Alþingis til almennings og hins vegar að varðveita efnið fyrir komandi kynslóðir.

Alþingi notar vefmælingarkerfið Plausible til þess að greina notkun á vef þingsins. Tilgangurinn er að fá fram tölfræðiupplýsingar sem notaðar eru til að þróa og betrumbæta vefinn. Þessar upplýsingar varpa t.d. ljósi á fjölda flettinga á vefsíðum og skjölum, upplýsingar frá tækjum sem heimsækja vefinn (svo sem tegund vafra, stýrikerfi, skjáupplausn, staðsetning niður á bæjarfélag), hvaða vefsíður vísuðu á vefinn og á hvaða vefi Alþingisvefurinn vísaði.

Til þess að vinna þessar upplýsingar er notast við IP-tölur notenda en þær eru gerðar ópersónugreinanlegar áður en vinnslan fer fram. Plausible varðveitir ekki IP-tölur og ekki er hægt að rekja þær til einstakra notenda. Plausible notar ekki vefkökur og hýsir öll gögn innan Evrópu. Nánari upplýsingar eru á vef Plausible.

Vefmælingarkerfið Plausible er notað fyrir althingi.is, althingistidindi.is, innri vef Alþingis, jonshus.dk, skolathing.is, ungmennavefur.is, rna.althingi.is og thjodvinafelag.is.

Sú vinnsla persónuupplýsinga sem fram fer í tengslum við vefgreiningu styðst við heimild í 6. tölul. 9. gr. laga nr. 90/2018, um persónuvernd og vinnslu persónuupplýsinga, sbr. f-lið 1. mgr. 6. gr. almennu persónuverndarreglugerðarinnar (ESB) 2016/679, en samkvæmt þessum ákvæðum er heimilt að vinna með persónuupplýsingar sé það nauðsynlegt vegna lögmætra hagsmuna sem ábyrgðaraðili eða þriðji aðili gætir, nema hagsmunir eða grundvallarréttindi og frelsi hins skráða sem krefjast verndar persónuupplýsinga vegi þyngra. Hinir lögmætu hagsmunir eru hér fólgnir í því að Alþingi geti veitt notendum vefsins betri þjónustu og sinnt fræðslu- og leiðbeiningarhlutverki sínu betur.

11.3. Samfélagsmiðlar

Alþingi er á samfélagsmiðlunum Facebook, Instagram, LinkedIn og X, sem hafa hver sína eigin persónuverndarstefnu. Notendur eru hvattir til að kynna sér persónuverndarstefnu þessara miðla. Alþingi er ábyrgðaraðili efnis sem birtist á samfélagsmiðlum þess. Markmið Alþingis með þátttöku á samfélagsmiðlum er tvíþætt; annars vegar að fræða almenning um hlutverk þingsins og dagleg störf og að auka skilning almennings á störfum þingsins, hins vegar að styðja við lýðræðið með því að auka gegnsæi og sýnileika Alþingis út á við, vekja athygli á lýðræðislegum réttindum borgaranna, vekja áhuga á stjórnmálum og auka áhuga almennings á þinginu.

Persónuverndarstefna Facebook
Persónuverndarstefna Instagram
Persónuverndarstefna LinkedIn
Persónuverndarstefna X

11.4. Alþingismenn

Skrifstofa Alþingis vinnur með persónuupplýsingar um alþingismenn til að geta greitt þeim þingfararkaup og annan þingfararkostnað og tryggt réttindi þeirra samkvæmt þingfararkaupslögum. Upplýsingar um laun þingmanna og kostnaðargreiðslur til þeirra eru birtar á vef Alþingis í hverjum mánuði. Skrifstofa Alþingis heldur utan um æviágrip alþingismanna og alþingismannatal á vef Alþingis í samræmi við ritstjórnarreglur samþykktar af forsætisnefnd.

Þá heldur skrifstofan utan um drengskaparheit þingmanna og varaþingmanna að stjórnarskránni og yfirlýsingar um að þeir hafi kynnt sér siðareglur fyrir alþingismenn. Loks hefur skrifstofan umsjón með hagsmunaskrá alþingismanna sem birt er á vef Alþingis. Nánar er fjallað um vinnslu persónuupplýsinga um alþingismenn í innri persónuverndarstefnu skrifstofu Alþingis.

Heimilt er að vinna framangreindar upplýsingar á grundvelli lagaskyldu samkvæmt stjórnarskrá, lögum nr. 55/1991, um þingsköp Alþingis, siðareglum fyrir alþingismenn, lögum nr. 88/1995, um þingfararkaup alþingismanna og þingfararkostnað, og reglum forsætisnefndar Alþingis um þingfararkostnað, sbr. 3. tölul. 9. gr. laga nr. 90/2018, um persónuvernd og vinnslu persónuupplýsinga (pvl.), og c-lið 1. mgr. 6. gr. almennu persónuverndarreglugerðarinnar (ESB) 2016/679 (pvrg.). Heimild til vinnslu viðkvæmra persónuupplýsinga er að finna í 1. tölul. og 5. tölul. 1. mgr. 11. gr. pvl., sbr. a- og e-lið 2. mgr. 9. gr. pvrg. Heimild til birtingar launa- og kostnaðargreiðslna á vef Alþingis byggist á 5. tölul. 9. gr. pvl. og e-lið 1. mgr. 6. gr. pvrg., þ.e. með vísan til almannahagsmuna og við beitingu opinbers valds.

11.5. Starfsfólk

Skrifstofa Alþingis vinnur með persónuupplýsingar um starfsfólk til að geta greitt því laun og tryggt réttindi þess á grundvelli kjarasamninga og vinnulöggjafar. Tilteknar upplýsingar eru nauðsynlegar til að geta greitt laun, svo sem tengiliðaupplýsingar, launaflokkur, tímaskráningar, skattþrep, stéttarfélagsaðild, bankaupplýsingar, lífeyrissjóðsupplýsingar, upplýsingar um viðveru og skuldir við innheimtumann ríkissjóðs. Þá eru aðgerðir starfsfólks í málaskrá skrifstofunnar skráðar í aðgerðaskrá. Aðrar upplýsingar eru tengdar starfslýsingu starfsfólks. Nánar er fjallað um vinnslu persónuupplýsinga um starfsfólk í innri persónuverndarstefnu skrifstofu Alþingis.

Heimilt er að vinna framangreindar upplýsingar þar sem það er nauðsynlegt til að efna ráðningarsamning, skv. 2. tölul. 9. gr. laga nr. 90/2018, um persónuvernd og vinnslu persónuupplýsinga (pvl.), sbr. b-lið 1. mgr. 6. gr. almennu persónuverndarreglugerðarinnar (ESB) 2016/679 (pvrg.). Heimilt er að vinna upplýsingar um stéttarfélagsaðild á grundvelli samþykkis starfsmanns, skv. 1. tölul. 1. mgr. 11. gr. pvl., sbr. a-lið 9. gr. pvrg.

11.6. Umsækjendur um störf

Skrifstofa Alþingis vinnur með persónuupplýsingar þeirra sem sækja um starf hjá skrifstofunni. Tilteknar upplýsingar eru nauðsynlegar við mat umsókna, svo sem tengiliðaupplýsingar, ferilskrá, kynningarbréf, upplýsingar um menntun, niðurstöður úr ráðningarviðtölum, umsagnir meðmælenda og önnur samskipti við umsækjendur. Þá getur komið til þess að próf eða raunhæf verkefni séu lögð fyrir umsækjendur og í einhverjum tilvikum eru umsækjendur beðnir um að taka persónuleikapróf.

Heimilt er að vinna framangreindar upplýsingar þar sem það er nauðsynlegt til að gera ráðstafanir áður en samningur er gerður, skv. 2. tölul. 9. gr. laga nr. 90/2018, um persónuvernd og vinnslu persónuupplýsinga (pvl.), sbr. b-lið 1. mgr. 6. gr. almennu persónuverndarreglugerðarinnar (ESB) 2016/679 (pvrg.). Framangreindar upplýsingar eru skráðar í málaskrá skrifstofunnar.

11.7. Umsóknir um íslenskan ríkisborgararétt með lögum

Alþingi veitir ríkisborgararétt með lögum. Í 5. mgr. 4. gr. laga um persónuvernd og vinnslu persónuupplýsinga segir að lögin og reglugerð ESB 2016/679 gildi ekki um vinnslu persónuupplýsinga sem fram fer í tengslum við störf Alþingis. Með vísan til þess að umsóknir um íslenskan ríkisborgararétt falla undir þingstörf gilda persónuverndarlög ekki um vinnslu persónuupplýsinga í tengslum við það verkefni.

11.8. Heiðurslaun listamanna

Samkvæmt lögum nr. 66/2012 veitir Alþingi árlega allt að 25 listamönnum heiðurslaun á fjárlögum. Í 5. mgr. 4. gr. laga um persónuvernd og vinnslu persónuupplýsinga segir að lögin og reglugerð ESB 2016/679 gildi ekki um vinnslu persónuupplýsinga sem fram fer í tengslum við störf Alþingis. Með vísan til þess að ákvörðun Alþingis um heiðurslaun listamanna fellur undir þingstörf gilda persónuverndarlög ekki um vinnslu persónuupplýsinga í tengslum við það verkefni.

11.9. Umsóknir um afnot fræðimannsíbúðar í Jónshúsi í Kaupmannahöfn

Afnotum af fræðimannsíbúðum í Jónshúsi í Kaupmannahöfn er úthlutað samkvæmt reglum forsætisnefndar Alþingis um Hús Jóns Sigurðssonar í Kaupmannahöfn. Íbúðirnar eru ætlaðar til afnota fyrir íslenska ríkisborgara og einstaklinga með lögheimili á Íslandi sem hyggjast vinna að rannsóknum, fræðistörfum eða verkefnum í Kaupmannahöfn eða nágrenni. Sérstök úthlutunarnefnd er skipuð af forseta Alþingis, að höfðu samráði við forsætisnefnd, og nýtur hún aðstoðar skrifstofu Alþingis.

Úthlutunarnefndin vinnur persónuupplýsingar um umsækjendur um fræðimannsíbúð og eftir atvikum maka þeirra. Unnið er með tengiliðaupplýsingar umsækjanda ásamt upplýsingum um menntun, starf, ferilskrá og upplýsingar um verkefni sem á að vinna í Jónshúsi.

Heimilt er að vinna framangreindar upplýsingar á grundvelli 3. tölul. 9. gr. laga nr. 90/2018, um persónuvernd og vinnslu persónuupplýsinga (pvl.), sbr. c-lið 1. mgr. 6. gr. almennu persónuverndarreglugerðarinnar (ESB) 2016/679 (pvrg.). Í einstaka tilfellum er unnið með viðkvæmar persónuupplýsingar eins og heilsufar og hjúskaparstöðu og sækir slík vinnsla heimildir til 1. og 5. tölul. 1. mgr. 11. gr. pvl., sbr. a- og e-lið 2. mgr. 9. gr. pvrg.

11.10 Umsagnir um þingmál

Samkvæmt 5. mgr. 4. gr. laga um persónuvernd og vinnslu persónuupplýsinga gilda lögin og reglugerð ESB 2016/679 ekki um vinnslu persónuupplýsinga sem fram fer í tengslum við störf Alþingis. Með vísan til þess að vinnsla, umsagnarferli og ákvarðanir Alþingis um þingmál, þ.m.t. frumvörp og þingsályktunartillögur, falla undir þingstörf gilda persónuverndarlög ekki um vinnslu persónuupplýsinga í tengslum við það verkefni. Umsagnaraðilum er bent á að samkvæmt starfsreglum fastanefnda Alþingis eru erindi sem berast nefndum í tengslum við þingmál að jafnaði birt á vef Alþingis.

12. Endurskoðun og ábyrgð

Skrifstofustjóri Alþingis ber ábyrgð á persónuverndarstefnunni og að henni sé framfylgt. Stefnuna skal endurskoða annað hvert ár, eða þegar tilefni er til.

Samþykkt af skrifstofustjóra Alþingis, að undangengnu samráði við framkvæmdastjórn, á grundvelli 17. gr. laga nr. 90/2018, um persónuvernd og vinnslu persónuupplýsinga og 13. og 14. gr. almennu persónuverndarreglugerðarinnar (ESB) 2016/679, 11. febrúar 2025.