breytingar á ýmsum lögum vegna eftirlits og leyfisveitinga Orkustofnunar.
Herra forseti. Þennan vetur hefur þingflokkur Pírata nýtt tækifærið í kjördæmavikum og þegar tími gefst og tekið hús á ýmsum aðilum sem tengjast orkugeiranum, bæði opinberum fyrirtækjum, stofnunum og einkaaðilum á markaðnum, og það hefur einmitt verið dálítið áhugavert að heyra ákveðinn samhljóm varðandi það sem þetta frumvarp snýst um. Fólk er almennt að kalla eftir því að Orkustofnun verði heimilað að taka gjald fyrir þá þjónustu sem hún er að veita til þess að hún geti veitt betri þjónustu, þannig að hún þurfi ekki að reka sig á framlögum í gegnum fjárlög sem eru ekki með sömu teygni og þjónustugjöld væru með gagnvart þeim verkefnum sem undir eru. Þannig að undirliggjandi hugmyndin í þessu frumvarpi er eitthvað sem ég ímynda mér að sé nokkuð mikill samhljómur um.
Það hversu vel tekst til fer allt eftir útfærslunni og einhvern veginn þarf að vera hægt að máta saman gjaldskrána og upphæðirnar sem lagðar eru á hverja umsókn við umfang úrvinnslunnar sem er Orkustofnunar megin þannig að bæði sé ekki verið að rukka meira en sem nemur raunverulegum kostnaði og líka til að Orkustofnun fái örugglega sem nemur þeirri vinnu sem innt er af hendi. Og eins og ég skil hæstv. ráðherra þá á að taka mið af einhverjum tölum í rekstraráætlunum sumra verkefnanna sem um ræðir. Mig langar að heyra aðeins frá ráðherranum hvort þetta sé endilega traustasti grunnurinn undir gjaldtöku, það hvert rekstrarumfang framkvæmdarinnar verður (Forseti hringir.) að framkvæmdastiginu loknu, hvort ekki sé auðveldara að mæla umfangið með einhverjum öðrum hætti.
