Kjartan Jóhannsson:
    Herra forseti. Skoðanir mínar á þessu máli eru kunnar. Ég tel afdráttarlaust að við eigum í fyrsta lagi að halda hiklaust áfram þeim athugunum sem í gangi eru og í annan stað að ef niðurstöður sýna að hér sé um hagkvæman kost að ræða og erlendir aðilar eru tilbúnir að ganga til samninga eigum við að ganga til slíkra samninga og þá með þá stefnu að ná jákvæðri niðurstöðu þannig að ráðist verði í þær framkvæmdir sem hér um ræðir.
    Hæstv. iðnrh. svaraði fyrirspurnum frá hv. 1. þm. Reykv. um þetta efni á mjög afdráttarlausan og skýran hátt og í samræmi við þá stefnu sem ég tel að okkur sé nauðsynleg og hef lýst mig fylgjandi og ég þakka hæstv. iðnrh. þessi skýru og afdráttarlausu svör.
    Ég vil af þessu tilefni minna á að það hefur oft komið til umræðu að atvinnulíf á Íslandi væri einhæft. En möguleikar okkar til að auka fjölbreytni þess eru reyndar nokkuð takmarkaðir og það hefur ekki gengið vel þrátt fyrir allar yfirlýsingar að auka hér fjölbreytni í atvinnulífi. Eitt af því sem við höfum stefnt að í því sambandi, einn af þeim fáu möguleikum sem virðast nokkuð borðleggjandi, er að nýta orkulindirnar til atvinnuuppbyggingar eins og fram er tekið í stjórnarsáttmála núv. ríkisstjórnar. Að þessu hefur verið unnið annað veifið, kannski með hléum stundum, en árangur hefur orðið takmarkaður. Sannleikurinn í þessu máli er vitaskuld sá að tækifærin bjóðast ekki alltaf og ævinlega eða alls staðar heldur bjóðast þau stundum og sums staðar og það á við núna líka. Ef stefna okkar er sú, sem ég held að sé meirihlutavilji fyrir, að auka hér fjölbreytni í atvinnulífi með þessum hætti verðum við að framfylgja þessari stefnu samfellt og vera reiðubúin að grípa tækifærin þegar þau gefast.
    Nú eru nokkrar horfur á því að slíkt tækifæri gefist og þá tel ég einsýnt og nauðsynlegt að menn séu reiðubúnir að grípa það tækifæri, ganga til samninga ef hinir erlendu viðsemjendur eru til þess reiðubúnir og hér reynist um hagkvæman kost að ræða. Að öðrum kosti verður stefna okkar marklaus og hlægileg og það má hún ekki vera.
    Í annan stað hlýt ég að vekja athygli á að þetta varðar líka álit á Íslendingum á erlendum vettvangi. Hér er um að ræða samskipti við erlenda aðila, það hefur verið unnið að þessu máli í nokkur ár og við viljum að það sé tekið mark á okkur. Þá koma engar kúvendingar til greina. Ef við viljum að það sé tekið mark á okkur, ef við viljum halda áliti okkar á erlendum vettvangi verður stefnan að vera sjálfri sér samkvæm. Þetta tvennt tel ég að hafi komið fram í ræðu hæstv. iðnrh. að hann er tilbúinn til þess að tryggja.
    Þessi eru kannski meginatriði málsins. Vitaskuld vitum við ekki um niðurstöður þeirra athugana sem hinir erlendu aðilar eru að vinna. Vitaskuld vitum við ekki hvernig gengur að semja við hina erlendu aðila, en stefnumörkunin, viðhorfið til þessara athugana, viðhorfið til þessara samningaumleitana þarf að vera skýrt og ljóst. Það hefur verið það í mínum huga og

ég tel mikla nauðsyn fyrir Íslendinga að þeir sýni staðfestu í þessu og ég tel að það hafi komið skýrt fram hjá hæstv. iðnrh. áðan að hann hyggist tryggja það og fyrir það tel ég að við öll eigum að vera þakklát.