Guðni Ágústsson:
    Hæstv. forseti. Það kemur nú í ljós hversu hættulegt er að halda hér fundi fram eftir nóttum. Menn vakna úrillir og hafa vart stjórn á geði sínu. En það sem ég vildi segja hér er þetta: Ég er hér með þingsköp Alþingis í höndunum. Hér er fyrirspurnatími í Sþ. og um það segir í þingsköpum: ,,Fyrirspyrjandi eða framsögumaður fyrirspyrjanda mælir fyrir fyrirspurn. Ráðherra, er hlut á að máli, svarar síðan fyrirspurn. Hvor um sig, fyrirspyrjandi og ráðherra, má ekki tala oftar en tvisvar, fyrirspyrjandi eigi lengur en tvær mínútur og ráðherra eigi lengur en fimm mínútur í senn. Öðrum þingmönnum er heimilt að gera stutta athugasemd.``
    Og því spyr ég: Hvers vegna leyfist hv. þm. að vera komnir í hrókaumræður eins og hér sé um almennan fund að ræða í Sþ.? Ég sætti mig illa við að þannig séu þingsköp brotin í Sþ. Ég held að við þurfum að standa fast á forminu.