Landbúnaðarráðherra (Steingrímur J. Sigfússon):
    Herra forseti. Ég ætla að ræða nokkuð þær brtt. sem hér hefur verið dreift á þskj. 686 og varða 28. og 29. gr. lánsfjárlagafrv.
    Þannig háttar til að þegar fjárlög voru afgreidd í vetur, þá var ljóst að fjárveitingar mundu ekki duga til að greiða styrki til jarðræktarframlaga og búfjárræktarframlaga eins og lög kveða á um og var þá sett í frv. til lánsfjárlaga skerðingarákvæði sambærilegt við það sem verið hafði hið næsta ár á undan. Jafnframt var þess getið við 3. umr. um fjárlög í framsöguræðu formanns fjvn. að fyrir dyrum stæði endurskoðun jarðræktarlaga og búfjárræktarlaga þar sem breytt yrði ákvæðum um styrki ríkisins til þessara mála og að í tengslum við þær lagabreytingar yrði sérstaklega tekið á og gengið frá uppgjöri á þeim framlögum sem ógreidd væru vegna framkvæmda frá fyrri árum. Hér er átt við jarðræktarframkvæmdir á árinu 1988 og búfjárræktarframlög á sama ári.
    Þessi endurskoðun laganna stendur nú yfir. Til athugunar er hjá þingflokkum stjórnarliðsins frv. til jarðræktarlaga og er það jafnframt til meðferðar á búnaðarþingi. Unnið er að endurskoðun búfjárræktarlaga og ætlunin er að leggja fram nýtt frv. til búfjárræktarlaga, a.m.k. þess hluta þess lagabálks sem snýr að búfjárræktarstarfinu sjálfu, hér á þessu þingi og afgreiða ef kostur er fyrir vorið.
    Það hefur síðan orðið að samkomulagi og í beinu samræmi við og framhaldi af afgreiðslu ríkisstjórnarinnar, afgreiðslu fjárlaga og þess fyrirvara eða þeirra upplýsinga sem fram komu í framsöguræðu formanns fjvn., að ákveðið er að afla lagaheimilda til að semja um uppgjör og tilhögun greiðslna vegna ógreiddra jarðræktarframlaga og búfjárræktarframlaga frá árinu 1988 í tengslum við afgreiðslu nýrra laga á þessum sviðum.
    Rétt er að taka það skýrt fram og undirstrika að að sjálfsögðu er ætlun að ríkissjóður standi að fullu við greiðsluskyldur sínar vegna gildandi laga á þessum sviðum. Hins vegar verður það að ráðast af getu hversu mikið verður unnt að greiða á þessu ári og hvernig greiðslunum verður hagað á næstunni en ekki er unnt að gefa um það endanleg svör hér á þessari stundu hversu hratt verður unnt að greiða upp þessar skuldir vegna framkvæmda frá fyrri árum.
    Nú kann það að fara svo, herra forseti, að dreifa þurfi þessari brtt. á þskj. 686 að nýju og þá prentaðri upp þar sem það er í athugun hvort minni háttar prentvilla hafi slæðst inn í textann. Mun ég þá gera grein fyrir því ef svo er og kveðja mér þá hljóðs að nýju ef með þarf. En að sjálfsögðu legg ég svo til, herra forseti, að þessar tillögur verði samþykktar.