Viðskiptaráðherra (Jón Sigurðsson):
    Virðulegi forseti. Ég mæli hér fyrir frv. til l. á þskj. 767 um breytingu á lögum nr. 58 frá 4. júní 1981, um lagmetisiðnað og Þróunarsjóð lagmetisiðnaðarins, með áorðnum breytingum. Þetta frv. er samið í iðnrn. og er flutt til að veita Þróunarsjóði lagmetisiðnaðarins heimild til að eignast hlutabréf í starfandi hlutafélögum eða eiga aðild að stofnun nýrra hlutafélaga í því skyni að auka framleiðni, vöruþróun og markaðsstarfsemi í lagmetisiðnaði. Frv. er flutt m.a. í ljósi þeirra erfiðleika sem nú eru í lagmetisiðnaðinum, en stjórn sjóðsins og Sölusamtök lagmetis hafa mælst til þess að slík heimild verði veitt.
    Ég ætla ekki að þessu sinni að fjölyrða um þá erfiðleika sem upp hafa komið í lagmetisiðnaðinum, en hinn 17. febr. sl. skipaði ég sérstakan starfshóp til að kanna stöðu greinarinnar og til að benda á leiðir til að bæta markaðsstöðu hennar. Á grundvelli tillagna þessa starfshóps fjallaði ríkisstjórnin um þetta mál á fundi sínum þann 7. mars sl. og samþykkti síðan á fundi 14. mars sl.:
    1. Að standa tímbundið straum af vaxtakostnaði vegna birgða og umbúða sem selja átti ALDI og Tengelmann fyrirtækjunum í Þýskalandi.
    2. Að veita 7 millj. kr. til samstarfsverkefna Sölusamtaka lagmetis og Útflutningsráðs um söluátak fyrir lagmeti.
    3. Að skipuleggja og kosta sérstakt átak til þess að selja óseldar birgðir af lagmeti á markaði þar sem aðstoð utanríkisviðskiptaráðuneytisins getur einkum komið að gagni og eru þar nefnd landsvæðin Austur-Evrópa og Japan.
    Jafnframt þessu hafa iðnaðar- og sjávarútvegsráðuneytin beint því til Sölusamtaka lagmetis, Ríkismats sjávarafurða og Rannsóknastofnunar fiskiðnaðarins að formlegt samstarfsverkefni verði hafið um átak í gæðamálum lagmetis. Sölusamtökin hafa þegar stigið mikilvægt skref í þessum málum með stofnun sérstakrar tæknideildar. Enn fremur er nú í gangi vinnuáætlun til að samræma íslenskt gæðaeftirlit á sviði lagmetis þeim sameiginlegu kröfum og stöðlum sem unnið hefur verið að í Evrópu vegna þróunar innri markaðar Evrópubandalagsins, en þetta er mikilvægt til þess að íslenskt lagmeti geti haldið sinni stöðu á Evrópumarkaðnum eftir árið 1992. Sérstakur samstarfshópur Ríkismatsins og Rannsóknastofnunar fiskiðnaðarins og Sölusamtakanna vinnur nú að nánari stefnumörkun um gæðamálin. Þróunarsjóður lagmetisiðnaðarins hefur á árunum 1987, 1988 og það sem af er ári 1989 veitt lán og styrki til vöruþróunar og gæðamála í lagmetisiðnaði að fjárhæð 5,3 millj. kr., til þróunar og til þess að gera umbúðir 4,8 millj. kr. og til tæknideildar Sölusamtakanna 5,1 millj. kr. Þá er gert ráð fyrir að Þróunarsjóður lagmetis styrki gæðaátakið sem ég minntist á. Höfuðáherslan í starfi sjóðsins hefur hins vegar verið á sviði markaðsmála, en sjóðurinn hefur á liðnum árum eytt rúmlega 10 millj. kr. árlega til markaðsmála fyrir

lagmetisiðnaðinn.
    Staða sjóðsins er nokkuð sterk og því þykir eðlilegt að rýmka um heimildir hans til að efla framleiðslu-, vöruþróunar- og markaðsstarf fyrir lagmetisiðnaðinn á þann hátt sem hér er gerð tillaga um.
    Virðulegi forseti. Ég ætla ekki að fara fleiri orðum um þetta mál, en óska þess að frv. fái skjóta meðferð hér í þingdeildinni. Að svo mæltu legg ég til að frv. verði að lokinni þessari umræðu vísað til hv. iðnn. og 2. umr.