Flm. (Egill Jónsson):
    Virðulegi forseti. Það er svo með þessa tillögu sem hina fyrri sem ég hef nú nýlega mælt hér fyrir að flm. eru þeir hinir sömu, þ.e. Egill Jónsson, Jón Kristjánsson og Hjörleifur Guttormsson. Tillagan er svohljóðandi, með leyfi hæstv. forseta:
    ,,Alþingi ályktar að fela samgönguráðherra að hlutast til um við Hafnamálastofnun ríkisins að hún hefji sem fyrst rannsóknir á innsiglingunni við Hornafjarðarós og öðrum aðstæðum í tengslum við skipaleiðir um Hornafjörð.``
    Aðstæður við Hornafjarðarós eiga sér enga hliðstæðu hér á landi og það má þakka fyrir að hvergi nokkurs staðar í heiminum sé um sambærilegar aðstæður að ræða. Ástæðan fyrir því er ákaflega auðskilin. Hér eru það náttúruöflin sem flétta saman sína fræði, Vatnajökull, árnar og svo sjórinn sem sameiginlega mynda Hornafjarðarós. Að sumrinu þegar vötn eru mikil þá helst ósinn bærilega opinn því þá er það mikið vatnsrennsli um ósinn. Hins vegar gegnir öðru máli að vetrum þegar vötn eru lítil og þegar þannig viðrar að umhleypingar hlaða upp sandi, byggja upp land austan óssins sem kallað er Austurfjörutangi og vex inn í ósinn. Þannig atvikast það að erfitt getur orðið og jafnvel útilokað í sumum tilvikum að halda uppi eðlilegum siglingum um Hornafjarðarós.
    Það liggur vissulega fyrir mikil þekking á þessum sérstöku högum við Hornafjörð, sem byggist á þeirri reynslu sem þar hefur fengist, bæði þeirra sem hafa með höndum að vísa skipum leið um Hornafjörð og hinna líka sem halda þar uppi stöðugum siglingum og þá sérstaklega sjómanna frá Höfn. Þessi þekking er mjög mikilvæg eins og öll reynsluvísindi eru og það má segja að á grundvelli þeirra hafi byggst þær aðgerðir sem menn hafa orðið að grípa til þegar skipaleiðir hafa lokast um Hornafjörð. En í rannsóknum á þessum vettvangi eins og svo mörgum öðrum eiga sér stað miklar framfarir og í þessu sambandi er vert að benda á það að rannsóknarstöð Hafnamálastofnunar hefur nú nýlega verið byggð upp og er orðin miklu fullkomnari og verðmætari árangur sem þaðan fæst. Það er talið að miðað við venjulegar aðstæður þurfi a.m.k. þrjú til fimm ár til þess að niðurstaða fáist úr öldumælingum og það má vel vera að í þessu tilviki, þar sem hér er um óvenjulegar aðstæður að ræða, þurfi jafnvel enn lengri tíma. Öldumælingar eru fremur einfaldur rannsóknaþáttur og ekki kostnaðarsamur þannig að það væri afar brýnt að hefja þær í nágrenni Hornafjarðar til þess að finna út hvernig sjólag er þar miðað við þau vísindi. Það er aldrei að vita til hvers slíkar mælingar gætu leitt. Auðvitað væri það gífurlega verðmætt ef það væri hægt að byggja upp hafnarmannvirki utan óssins í framtíðinni því eins og menn vita þá er hér um að ræða gífurlega verðmæta höfn. Sterkt samfélag sveita og sjávarbyggða sem á tvímælalaust fyrir sér mjög mikla möguleika.
    Það virðist kannski fjarlægt að hugsa til þess að

hafnarmannvirki rísi utan fjarðar og um það verður að sjálfsögðu ekkert fullyrt hér á þessari stundu. Það er líka e.t.v. erfitt að hugsa sér það með tilliti til þeirra fjármuna sem veitt hefur verið og veitt er til hafnarmála hér í okkar landi, en það er ekki ólíklegt. Það væri raunar góður kostur að almennt séð væru hafnarmannvirkjum gerð betri skil í fjárveitingum og þeim skapaður sérstakur tekjustofn og þá er vel líklegt að sérstök verkefni væru þar afmörkuð eins og gerist bæði í flugmálum og vegamálum þar sem um sérstæðar og stórar framkvæmdir er að ræða. Það getur þess vegna alls ekki á nokkurn hátt talist óskhyggja þótt hér verði horfið til þess, sem tillaga okkar þm. úr Austurlandskjördæmi gerir ráð fyrir, að hafnar verði skipulagðar rannsóknir við Hornafjörð.
    Ég vil svo, virðulegi forseti, að lokinni þessari umræðu leggja til að þessari tillögu verði vísað til allshn. Sþ.