Jón Sæmundur Sigurjónsson:
    Virðulegi forseti. Ég hef tekið að mér að bera fram fsp. samflokksmanns míns Láru V. Júlíusdóttur sem hefur verið hér um skeið varaþingmaður en hefur orðið að hverfa af vettvangi. Fsp. er um fæðingarorlof og barnsburðarleyfi.
    Árið 1988 tóku gildi hér á landi ný lög um fæðingarorlof. Helstu ákvæði laganna voru þess efnis að fæðingarorlof var lengt verulega frá því sem áður var, úr þremur mánuðum í sex mánuði í áföngum. Þegar núgildandi fæðingarorlofslög voru sett komu fram fyrirheit um samræmingu á rétti foreldra til fæðingarorlofs og skyldi unnið að slíkri samræmingu í framhaldi af lagasetningunni. Samræma skyldi rétt foreldra til fæðingarorlofs þannig að hann yrði sá sami fyrir fólk á almennum vinnumarkaði og fólk í störfum hjá hinu opinbera. Þann tíma sem liðinn er frá því að lögin voru sett hefur enn dregið í sundur hvað réttindi þessara tveggja hópa varðar. Til að fylgja eftir því sjónarmiði að samræma rétt fólks til fæðingarorlofs gaf ríkisstjórnin fyrirheit í tengslum við kjarasamninga sl. vor um að hér skyldi bætt úr. Til að átta sig á verkefninu er nauðsynlegt að hafa upplýsingar um tölulegar staðreyndir málsins. Því ber ég fram fsp. til hæstv. fjmrh. á þskj. 83 um fæðingarorlof og barnsburðarleyfi. Fsp. hljóðar þannig:
,,1. Hve margar konur í starfi hjá ríkinu fengu fæðingarorlof árin 1986, 1987, 1988 og fram til 1. október 1989?
    2. Hve háar fjárhæðir greiddi ríkissjóður vegna fæðingarorlofs árin 1986, 1987, 1988 og fram til 1. október 1989?
    3. Hve margar konur nýttu sér rétt til að taka lengra barnsburðarleyfi framangreint tímabil skv. 5. gr. reglugerðar um barnsburðarleyfi?``