Frsm. meiri hl. fjh.- og viðskn. (Páll Pétursson):
    Herra forseti. Á þskj. 342 liggur fyrir álit meiri hl. fjh.- og viðskn., þ.e. Jóns Sæmundar Sigurjónssonar, Guðmundar G. Þórarinssonar, Þórðar Skúlasonar og mitt, um frv. til laga um breytingu á lögum nr. 75/1981, um tekjuskatt og eignarskatt, með síðari breytingum. Nefndin hefur fjallað um þetta frv. undanfarna daga og samhliða umfjöllun sinni um stjfrv. á þskj. 247 hefur nefndin fjallað um nokkur þingmannafrumvörp sem hefur verið vísað til hennar. Niðurstaðan af umfjöllun nefndarinnar er sú að hún flytur í heild nokkrar brtt. við stjfrv. þar sem tekið er mið af þmfrv. á þskj. 208 að hluta til.
    Við umfjöllun sína hefur nefndin notið ágætrar aðstoðar Ævars Ísbergs, Steinþórs Haraldssonar og Friðleifs Jónssonar frá embætti ríkisskatttsjóra og Snorra Olsens og Maríönnu Jónasdóttur frá fjmrn. Eftirtaldir komu til viðræðna við nefndina um áðurgreind frv.: Þuríður Pálsdóttir, Ingileif Hallgrímsdóttir, Margrét Thorlacius og Kristjana Milla Thorsteinsson frá Húseigendafélaginu, Ari Skúlason og Ásmundur Stefánsson frá ASÍ, Þórarinn V. Þórarinsson og Hannes
Sigurðsson frá VSÍ, Björn Arnórsson og Sigurður Jóhannesson frá BSRB, Þórður Friðjónsson, Jóhann Rúnar Björgvinsson og Stefán Þór Jansen frá Þjóðhagsstofnun, Eiríkur Guðnason frá Verðbréfaþingi Íslands, Sigurður B. Stefánsson frá verðbréfadeild Iðnaðarbankans, Vilhjálmur Egilsson frá Verslunarráði Íslands, Birgir Björn Sigurjónsson og Páll Halldórsson frá BHMR, Gunnar Jóhannsson, Ólafur H. Ólafsson, Gylfi Knudsen og Guðmundur E. Erlendsson frá ríkisskattanefnd, Grétar Guðmundsson, aðstoðarmaður félagsmálaráðherra, Jón Sigurðsson endurskoðandi og Valgarð Briem hrl.
    Nefndin leggur til að frv. verði samþykkt með breytingum sem fluttar eru á þskj. 343. Með brtt. þessum eru í fyrsta lagi heimildir til frádráttar frá tekjum vegna fjárfestingar einstaklinga í atvinnurekstri rýmkaðar frá því sem er í frv., í stað 108 þús. og 216 þús. í a-lið komi 115 þús. og 230 þús.
    Í öðru lagi er með 2. og 3. brtt. ætlað að koma í veg fyrir óeðlilega skattlagningu forráðamanns barns þegar barnið hefur erft eignir eftir látið foreldri, foreldra eða aðra vandamenn. Samkvæmt gildandi lögum eru eignatekjur og aðrar tekjur barns en launatekjur nú skattlagðar að fullu hjá foreldri eða hjá þeim sem nýtur barnabóta vegna barnsins en hann getur verið því með öllu óskyldur. Um eignir gildir að þær eru skattlagðar hjá forráðamanni barns og bætast við skattstofn hans og geta valdið því að hann lendi í efsta skattþrepi með eignir sem hann á ekki. Í brtt. er lagt til að heimilt sé í slíkum tilvikum að skattlagning færist frá forráðamanni yfir á barnið sjálft.
    Með 4. og 5. brtt., þ.e. að fella brott 11. og 12. gr. frv., eru felld út úr frv. ákvæði sem varða ríkisskattanefnd, en við ákváðum að fresta um sinn, a.m.k. fram yfir áramót, breytingum á skipan á

starfsháttum ríkisskattanefndar. Það atriði er raunar ekki tengt breytingum á tekju- og eignarskatti sem nauðsynlegt er að lögfesta fyrir áramót.
    Með 6. brtt. er verið að gera nauðsynlegar leiðréttingar sem leiða af öðrum breytingum á frv. Öll nefndin stendur sem sagt að þessum brtt. óskipt og meiri hl. leggur til að frv. verði samþykkt með þessum breytingum.