Frsm. utanrmn. (Jóhann Einvarðsson):
    Hæstv. forseti. Utanrmn. hefur fjallað um till. til þál. um ályktanir Vestnorræna þingmannaráðsins 1989 og hefur skilað frá sér svofelldu nál.:
    ,,Nefndin hefur fjallað um tillöguna og leggur til að hún verði samþykkt með breytingu sem flutt er tillaga um á sérstöku þingskjali.
    Nefndinni barst umsögn um tillöguna frá Íslandsdeild Norðurlandaráðs og er hún prentuð sem fylgiskjal með þessu nefndaráliti.``
    Undir þetta nál. skrifa allir fulltrúar í utanrmn.
    Brtt. á þskj. 707 er þannig: ,,Í stað orðanna ,,hrint verði í framkvæmd ályktunum`` komi: vinna að framkvæmd ályktana.`` Þessi brtt. er gerð í samráði við 1. flm. þáltill. Þótti skynsamlegra að orða þetta heldur opið en svona beint að hrinda í framkvæmd því að það eru náttúrlega ýmis atriði í tillögunni sem ekki er unnt að koma í framkvæmd á svipstundu. Um þetta er gott samkomulag við 1. flm.