Ferill 386. máls. Aðrar útgáfur af skjalinu: Word Perfect.
1989–90. – 1059 ár frá stofnun Alþingis.
112. löggjafarþing. – 386 . mál.
Nd.
1227. Nefndarálit
um frv. til. l. um skipan prestakalla og prófastdæma og um starfsmenn þjóðkirkju Íslands.
Frá allsherjarnefnd.
Nefndin hefur fjallað um málið og komu séra Gunnlaugur Garðarsson og séra Kristinn Ágúst Friðfinnsson frá Félagi brauðlausra presta á fund nefndarinnar. Umsagnir bárust um frumvarpið frá Hraungerðis- og Villingaholtssóknum.
Nefndin er samþykk flestum þeim breytingum sem gerðar voru á frumvarpinu í meðförum efri deildar en leggur þó til breytingu á Stóranúps- og Selfossprestaköllum. Felst hún í því að Hraungerðis-, Villingaholts- og Laugardælasóknir verði sameinaðar í nýju prestakalli, Hraungerðisprestakalli.
Þá flytur nefndin nokkrar nýjar breytingartillögur. Lagt er til að ráðningartími aðstoðarpresta lengist úr þremur árum í fjögur. Þá er lagt til að vígslubiskup í Skálholti njóti aðstoðar nágrannapresta eða farprests í stað þess að ráðinn sé aðstoðarprestur að Skálholti. Er þetta sama fyrirkomulag og er í Hólaprestakalli. Enn fremur leggur nefndin til að 48. gr. frumvarpsins falli brott en hún fjallar um réttarstöðu prests ef prestakall leggst niður. Nefndin telur að greinin geti brotið í bága við lög um veitingu prestakalla, nr. 44/1987, auk þess sem 14. gr. laga nr. 38/1954, um réttindi og skyldur starfsmanna ríkisins, fjallar um réttarstöðu ríkisstarfsmanna ef staða er lögð niður. Að lokum er lagt til að gerð verði orðalagsbreyting á ákvæði til bráðabirgða og að lögin verði endurskoðuð eigi síðar en 1995 í stað 1998.
Nefndin leggur til að frumvarpið verði samþykkt með þessum breytingum sem gerð er tillaga um á sérstöku þingskjali en einstakir nefndarmenn áskilja sér rétt til að flytja eða fylgja breytingartillögum.
Friðjón Þórðarson var fjarverandi afgreiðslu málsins.
Alþingi, 3. maí 1990.
Jón Kristjánsson,
form., frsm.
Ólafur G. Einarsson,
fundaskr.
Aðalheiður Bjarnfreðsdóttir.
Ingi Björn Albertsson.
Sighvatur Björgvinsson.
Guðni Ágústsson.
