Forseti (Guðrún Helgadóttir) :
Borist hefur svohljóðandi bréf frá hæstv. forseta Nd.:
,,Halldór Blöndal, varaformaður þingflokks Sjálfstfl., hefur ritað mér á þessa leið:
,,Þar sem Þorsteinn Pálsson er erlendis í opinberum erindum og getur því ekki sótt þingfundi á næstunni leyfi ég mér að hans beiðni með skírskotun til 130. gr. laga um kosningar til Alþingis að óska þess að 1. varamaður Sjálfstfl. í Suðurlandskjördæmi, Árni Johnsen blaðamaður, taki sæti á Alþingi í fjarveru hans.``
Þetta er yður hér með tilkynnt, hæstv. forseti.
Árni Johnsen hefur áður setið á þingi á þessu kjörtímabili og ég býð hann velkominn til starfa.
Þá hefur borist annað bréf, einnig frá hæstv. forseta Nd. Það hljóðar svo:
,,Þórhildur Þorleifsdóttir, 12. þm. Reykv., hefur ritað mér á þessa leið:
,,Þar sem ég sökum anna get ekki sótt þingfundi á næstunni leyfi ég mér með skírskotun til 130. gr. laga um kosningar til Alþingis að óska þess að vegna forfalla 1. og 2. varamanns taki 3. varamaður Kvennalistans í Reykjavík, Sigrún Helgadóttir líffræðingur, sæti á Alþingi í fjarveru minni.``
Þetta er yður hér með tilkynnt, hæstv. forseti.
Þá hefur borist eftirfarandi bréf:
,,Vegna anna get ég undirrituð ekki tekið sæti á Alþingi í fjarveru Þórhildar Þorleifsdóttur.
Þá hefur borist annað bréf:
,,Sökum anna sé ég mér ekki fært að taka sæti á þingi í fjarveru Þórhildar Þorleifsdóttur, þingkonu Kvennalistans.
Sigrún Helgadóttir hefur áður tekið sæti á Alþingi á þessu kjörtímabili og ég býð hana velkomna til starfa.
