Guðrún J. Halldórsdóttir :
    Virðulegi forseti. Ég er sammála hv. 5. þm. Reykv. um að það er til fólk sem iðkar það að skila ekki skattaframtali til þess að reyna að græða á því og það á auðvitað ekki að gefa því fólki neinar ívilnanir. En það er þó nokkur hluti fólks sem vegna ýmissa annarra ástæðna telur ekki fram til skatts. Skattaframtalið þeirra getur týnst. Algengara er þó að fólk telji ekki fram til skatts vegna veikinda eða félagslegra eða tilfinningalegra vandamála sem upp koma. Það er rétt hjá hv. 5. þm. Reykv. að í flestum slíkum tilfellum fá viðkomandi aðilar leiðréttingu sinna mála. Það geta bara liðið margir mánuðir þangað til leiðréttingin kemur. Ég veit dæmi þess að einstæðir foreldrar hafa ekki átt málungi matar mánuðum saman vegna þess að þeir voru að bíða eftir úrlausninni sem svo síðan kom. Þetta er mál sem verður að taka á og gæta þess að svona gangi þetta ekki áfram.
    Að við skulum í framtíðinni sjá fram á það að við, sem erum á kaupi hjá hinu opinbera, þurfum ekki að telja fram til skatts tel ég afskaplega ánægjulegt vegna þess að það ætti í raun og veru að vera óþarfi, en það er allt annað mál. Þetta mál þarfnast úrlausnar núna og við þurfum að gera það á milli 2. og 3. umr.