Umhverfisráðherra (Eiður Guðnason)
(andsvar)
:
Virðulegi forseti. Ég held að það sé rétt að undirstrika það og leggja sérstaka áherslu á það vegna þess að þeirri firru hefur of oft verið haldið fram úr þessum ræðustól af ýmsum hv. þm. að Íslendingar hafi brotið einhverja samninga, lög eða alþjóðareglur í sambandi við hvalveiðimál. Það hafa þeir ekki gert. Við höfum í hvívetna, --- og það legg ég sérstaka áherslu á, --- í hvívetna farið að lögum og reglum, öllum þeim samþykktum sem við höfum verið aðilar að og hvergi brotið þar gerða samninga við aðrar þjóðir.
