Ferill 426. máls. Aðrar útgáfur af skjalinu: Word Perfect.
1991–92. – 1061 ár frá stofnun Alþingis.
115. löggjafarþing. – 426 . mál.
684. Frumvarp til laga
um breytingu á lögum nr. 24/1986, um skiptaverðmæti og greiðslumiðlun innan sjávarútvegsins, með síðari breytingum.
Flm.: Árni R. Árnason, Halldór Ásgrímsson, Steingrímur J. Sigfússon,
Össur Skarphéðinsson, Anna Ólafsdóttir Björnsson.
1. gr.
3. tölul. 9. gr. laganna orðast svo:
Til Farmanna- og fiskimannasambands Íslands og Vélstjórafélags Íslands.
2. gr.
Við 9. gr. laganna bætist ný málsgrein er orðast svo:
Sjávarútvegsráðherra setur reglur um skiptingu fjár milli samtaka sem getið er í 2. og 3. tölul. 1. mgr. Skal við þá ákvörðun taka mið af fjölda félagsmanna sem við fiskveiðar vinna.
3. gr.
Lög þessi öðlast þegar gildi.
Greinargerð.
Frumvarp þetta mælir fyrir um breytingu á lögum nr. 24/1986, um skiptaverðmæti og greiðslumiðlun innan sjávarútvegsins. Efni þess hefur verið til umræðu í sjávarútvegsnefnd og er það flutt að beiðni Vélstjórafélags Íslands.
Breyting sú, sem lögð er til, felur í sér að það fé af greiðslumiðlunarreikningi fiskiskipa, sem rennur til Farmanna- og fiskimannasambands Íslands skv. 9. gr. laganna, mundi einnig renna til Vélstjórafélags Íslands þar sem félagið á nú ekki lengur aðild að Farmanna- og fiskimannasambandinu. Lagt er til að sjávarútvegsráðherra setji reglur um skiptingu fjár milli þeirra samtaka sem getið er annars vegar í 2. og hins vegar 3. tölul. 9. gr. laganna.
