Kristín Einarsdóttir (andsvar) :
Virðulegur forseti. Ég veit ekki hvers vegna hv. formaður iðnn. skýrir það ekki út sem í frv. felst. Hann segir mig ekki skilja það sem stendur í frv. --- ég veit ekki hvernig hann gat komið með þá niðurstöðu --- og að ég hefði fallið á prófi. Það er nefnilega hægt að lesa utan skóla líka og fá jafnvel jafnvel hærri einkunn þannig. Það sem mér finnst skipta máli í þessu, ef það er alvara að baki því sem þingmaðurinn sagði, er að þá skuldum við í iðnn. þinginu skýringar á frv. Þess vegna erum við að vinna að málinu. Við erum búin að taka þetta fyrir á mörgum fundum og vinna þetta mál nokkuð vel. Ég sagði áðan í minni ræðu að mér fyndist að formaður nefndarinnar ætti að skýra út fyrir þingheimi hvað í þessu máli felst en ekki að gera bara grín og segja að það skipti engu máli hvort þingheimur skilji það sem verið er að samþykkja hér. Það tók okkur nokkra fundi að fara
yfir þetta mál og þá finnst mér að nefndin og formaðurinn fyrir hennar hönd eigi að skýra út fyrir þingheimi hvað í frv. felst.
