Páll Pétursson (andsvar) :
Frú forseti. Ég veit mætavel að hæstv. landbrh. er ekki grasbítur og mér hefur aldrei dottið í hug
að segja það. Ég sagði að hann hefði lotið í gras.
Ég sleit ekkert úr samhengi. Ég tek meira mark á aðstoðarmanni landbrh. heldur en hæstv. landbrh. sjálfum og ég tek miklu meira mark á þeim títtnefnda aðstoðarmanni heldur en utanrrh. Ég veit það að hæstv. landbrh. vinnur af bestu getu að sínu embætti, en hann náði bara ekki meiri árangri í þessari lotu heldur en þetta og það var hæstv. utanrrh. sem hrósaði sigri í viðureigninni og hann boðaði til sérstaks leynilegs blaðamannafundar til þess að koma sinni túlkun og sínum sjónarmiðum á framfæri, hvað hann hefði nú staðið sig vel, hvað hann hefði nú klárað hæstv. landbrh. rækilega, boðaði til sérstaks fundar með blaðamönnum á þriðjudaginn var í varnarmáladeild utanrrn.