[15:25]
Fyrirspyrjandi (Siv Friðleifsdóttir):
Ég vil þakka hæstv. ráðherra fyrir svörin. Það er alveg rétt að það hafa allir áhuga á því að gera vel í sínu kjördæmi og koma samgöngum þar í gott horf. Ég var nú að vonast til að hæstv. ráðherra mundi gefa upp einhverja afstöðu til þeirra hugmynda sem hér komu fram í máli mínu um að taka Reykjanesbrautina út fyrir sviga, eins og það er kallað, og litið yrði á hana sem nokkurs konar þjóðarátak. Það kostar um 700 millj. að gera endurbætur á henni. M.a. felst það í því að lýsa hana og við þingmenn kjördæmisins erum sammála um að það sé mjög brýnt. Það þarf einnig að bæta við þriðju akgreininni og auka þverhallann á henni svo vatn safnist ekki fyrir á brautinni. Þetta kostar hvorki meira né minna en 700 millj. kr.
Okkar kjördæmi hefur farið mjög halloka út úr skiptingu á vegafé þannig að það væri mjög æskilegt að fá eitthvert svar frá ráðherra við þeirri hugmynd hvort hugsanlegt væri að líta á þessa stóru framkvæmd sem þjóðarátak.