[15:21]
Félagsmálaráðherra (Páll Pétursson) (andsvar):
Herra forseti. Ég er lítillátur maður og hef nú enga minnimáttarkennd þegar ég þarf að tala um húsnæðismál við forvera minn í embætti, hv. þm. Rannveigu Guðmundsdóttur. Varðandi félagslegu íbúðirnar sem hún nefndi áðan þá hefur bygging verið hafin á árinu. Þrátt fyrir þau áform sem uppi voru við síðustu fjárlagagerð hefur ekki verið byrjað á nema innan við 200 íbúðum á þessu ári. Innan við 200 íbúðum. Það er vegna þess að mönnum sýnist að sá kostur sé ekki nógu vænlegur. Á næsta ári verður fjármagn til reiðu samkvæmt því fjárlagafrumvarpi sem hér er til meðferðar til 220 íbúða.