[12:50]
Fjármálaráðherra (Friðrik Sophusson):
Virðulegi forseti. Nú liggja fyrir um það bil niðurstöðutölur fjárlaga og lánsfjárlaga fyrir næsta ár. Gangi áform eftir verður halli ríkissjóðs rétt innan við 4 milljarðar árið 1996 eða sem svarar 0,8% af landsframleiðslu og er það þá minnsti halli frá 1984. Útgjöld lækka í hlutfalli við landsframleiðslu um 1,5% frá árinu 1995 eða úr 27,1% í 25,6% og hefur útgjaldahlutfallið ekki verið lægra síðan 1987. (Gripið fram í: Er þetta orðið staðreynd?) Skatttekjur munu lækka sömuleiðis eins og áður hefur komið fram. Lánsfjárþörf ríkisins er talin geta lækkað um 2,3 milljarða og skuldir ríkisins munu lækka í hlutfalli við landsframleiðslu. Þetta hlýtur að teljast viðunandi árangur og skref í átt til jafnvægis og þess vegna segi ég já.