Ferill 478. máls. Aðrar útgáfur af skjalinu: Word Perfect.
1995–96. – 1065 ár frá stofnun Alþingis.
120. löggjafarþing. – 478 . mál.
822. Beiðni um skýrslu
frá dómsmálaráðherra um málefni Neyðarlínunnar hf.
Frá Lúðvík Bergvinssyni, Ögmundi Jónassyni, Bryndísi Hlöðversdóttur,
Gísla S. Einarssyni, Guðmundi Árna Stefánssyni, Hjörleifi Guttormssyni,
Ingibjörgu Sigmundsdóttur, Jóni Baldvini Hannibalssyni, Ragnari Arnalds,
Rannveigu Guðmundsdóttur, Sighvati Björgvinssyni, Sigríði Jóhannesdóttur,
Steingrími J. Sigfússyni, Svavari Gestssyni og Össuri Skarphéðinssyni.
Með vísun til 46. gr. laga um þingsköp Alþingis er þess óskað að dómsmálaráðherra leggi fyrir Alþingi skýrslu um ákvarðanir sínar og málsmeðferð er varðar málefni Neyðarlínunnar hf.
Í ljósi mikillar óánægju og gagnrýni á ákvörðun dómsmálaráðherra um hvernig hagað skuli fyrirkomulagi á rekstri samræmdrar neyðarsímsvörunar fyrir landið allt (112), af hálfu lögreglu-, slökkviliðs- og sjúkraflutningamanna auk lækna, verði m.a. gerð grein fyrir hvernig staðið var að vali á þeim fyrirtækjum og stofnunum sem aðild eiga að Neyðarlínunni hf., hvaða skilyrði voru sett fyrir aðild og hvaða kröfur viðkomandi aðilar þurftu að uppfylla og einnig fyrir forsendum og útreikningum ráðuneytisins vegna samnings þess við Neyðarlínuna hf. Jafnframt verði upplýst um heildarkostnað ríkis, sveitarfélaga og stofnana þeirra næstu átta árin af rekstri Neyðarlínunnar hf. og um árlegt framlag Reykjavíkurborgar, Slysavarnafélags Íslands og Pósts og síma til starfseminnar. Þá verði upplýst um áætlaðan byggingarkostnað þess húsnæðis sem verið er að reisa yfir starfsemina.
Lagðir verði fram nákvæmir útreikningar um hagkvæmni þeirrar leiðar sem ráðherra ákvað að fara borið saman við aðrar leiðir sem kannaðar voru, auk þess sem upplýst verði hvaða leiðir voru kannaðar. Því verði svarað hvort mögulegt sé að nýta þann tækjabúnað sem nú er fyrir hendi hjá lögreglu eða slökkviliði eða öðrum aðilum hér á landi til að sinna þjónustunni sem Neyðarlínunni hf. er ætlað að sinna. Rökstudd verði nauðsyn þess að skilja að símsvörun annars vegar og starfsemi viðbragðsaðila hins vegar, jafnframt því sem gefnar verði upplýsingar um hvernig slíkri starfsemi er háttað annars staðar á Norðurlöndum.
Fram komi hvaða kröfur ráðuneytið hefur sett um faglega kunnáttu starfsfólks Neyðarlínunnar hf., einkum er varðar skólagöngu þess, reynslu í starfi og af vettvangi. Þá verði í skýrslunni gerð grein fyrir hvernig samstarfi ráðherra annars vegar og heilbrigðisstétta, sjúkrahúsa, lögreglu og slökkviliðs hins vegar hafi verið háttað meðan á undirbúningi málsins stóð og hvort fulltrúar þessara hópa hafi á einhverju stigi undirbúnings málsins komið að því og með hvaða hætti. Jafnframt verði upplýst um nauðsyn þess að ráðast í byggingu nýs húsnæðis og hvers vegna húsnæðinu er auk þess að hýsa starfsemi Neyðarlínunnar hf. ætlað að hýsa starfsemi einkafyrirtækja og hvernig starfsemi þessara aðila fer saman, t.d. varðandi trúnaðarupplýsingar.
Í skýrslunni komi fram upplýsingar um kostnað við kaup nauðsynlegra tækja, fjármögnun þeirra og hvernig eignarhaldi og ráðstöfunar- og notkunarrétti verði háttað á húsnæði og tækjum Neyðarlínunnar hf., auk þess hvernig samvinnu starfsmanna Neyðarlínunnar hf. annars vegar og starfsmanna þeirra einkafyrirtækja sem aðild eiga að Neyðarlínunni hins vegar verði háttað. Að lokum verði gerð grein fyrir gjaldskrá Neyðarlínunnar hf. og væntanlegum sértekjum hennar.
Greinargerð.
Með samþykkt laga um samræmda neyðarsímsvörun, nr. 25/1995, var ákveðið að koma á fót samræmdri neyðarsímsvörun fyrir landið allt til að sinna viðtöku tilkynninga um fólk og eignir í neyð og beiðnum um aðstoð lögreglu, slökkviliðs, björgunarsveita og sjúkraflutningaliðs og aðra neyðaraðstoð.
Í lögunum er kveðið á um að til að sinna viðtöku og úrvinnslu þeirra tilkynninga sem berast um samræmt neyðarsímanúmer skuli koma upp vaktstöð eða vaktstöðvum. Í lögunum er dómsmálaráðherra svo nánast fengið sjálfdæmi um hvernig slíkri stöð eða stöðvum er komið á fót og á hendi hvers reksturinn verði.
Rekstur samræmds neyðarnúmers er framfaramál sem varðar öryggi allra landsmanna. Því er mikilvægt að sátt ríki um hann. Sú sátt næst ekki nema öryggi landsmanna sé tryggt. Í ljósi þeirrar gagnrýni sem fram hefur komið, sérstaklega af hálfu þeirra aðila sem starfa munu náið með Neyðarlínunni hf., á þá ákvörðun dómsmálaráðherra að fela Neyðarlínunni hf. rekstur einnar vaktstöðvar fyrir landið allt og vegna þeirra miklu fjárfestinga og útgjalda sem ríki og sveitarfélög þurfa að standa straum af vegna uppbyggingar og reksturs Neyðarlínunnar hf. er þess óskað að ráðherra geri í skýrslu til Alþingis ítarlega grein fyrir málsmeðferð af sinni hálfu, allt frá því að lögin voru samþykkt.
