Ferill 197. máls. Aðrar útgáfur af skjalinu: Word Perfect.
1996. – 1066 ár frá stofnun Alþingis.
121. löggjafarþing. – 197 . mál.
223. Frumvarp til laga
um breyting á vegalögum, nr. 45/1994.
Flm.: Svavar Gestsson, Sigríður Jóhannesdóttir,
Hjörleifur Guttormsson.
1. gr.
Á eftir orðinu „skógræktarsvæða“ í niðurlagi 1. mgr. 16. gr. laganna kemur: vegi sem sérstaklega eru afmarkaðir fyrir umferð reiðhjóla.
2. gr.
Lög þessi öðlast þegar gildi.
Greinargerð.
Frumvarpið var lagt fram á 118. og 120. löggjafarþingi en hlaut ekki afgreiðslu. Þá fylgdi því þessi stutta greinargerð:
Notkun reiðhjóla hefur aukist hér á landi á undanförnum árum. Hafa bæjarfélög brugðist við því með því að leggja sérstakar brautir fyrir umferð reiðhjóla. Þannig hefur orðið til nær samfellt net reiðhjólastíga á þéttbýlissvæðinu á suðvesturhorni landsins.
Þessi mál hafa ekki verið flutt inn á vettvang Alþingis áður. Hér er lögð fram tillaga um að vegir, afmarkaðir fyrir reiðhjól, verði teknir inn í vegalög sem væri fyrsta skrefið. Í framhaldi af því þyrfti svo að verða til samfellt net reiðhjólastíga á stærri svæðum. Vonandi verður tillagan til að vekja umræður sem síðan leiða til ákvarðana á Alþingi í þessum efnum.
