Svanfríður Jónasdóttir:
Herra forseti. Ég vil gjarnan vekja athygli hæstv. fjmrh. á því að handverksfólki finnst því vera mismunað gagnvart t.d. þeim sem búa til höggmyndir eða önnur myndverk sem undanþegin eru virðisaukaskatti og jafnframt bendir handverksfólk á að ákveðin mismunun sé í gangi innan hópsins. Þannig þurfi þeir sem eru launamenn eða hafa ekki atvinnutekjur ekki að greiða virðisaukaskatt af þeim fyrstu ríflega 200 þús. kr. sem þeir fá fyrir sitt handverk á meðan t.d. bændur þurfa að greiða virðisaukaskatt af allri sinni framleiðslu. Þar er ákveðin mismunun í gangi.
Ég skora því á hæstv. fjmrh. að skoða þessi atriði ögn betur með það að leiðarljósi að lögunum verði breytt svo að þessari mismunun gagnvart handverksfólkinu verði eytt.