[prenta uppsett í dálka] 36. fundur
Siv Friðleifsdóttir (andsvar):
Virðulegur forseti. Ég er búin að vera sveitarstjórnarmaður í sjö ár eins og fram hefur komið og innihald minnar ræðu var ekki það að ég treysti ekki sveitarfélögunum, alls ekki. Hér er spurt: Hvenær verður sveitarfélag burðugt til þess að sinna skipulags- og byggingarmálum uppi á miðhálendinu? Það er spurningin? Það er ekkert einhlítt svar við því. Ég get ekki nefnt neina íbúatölu. Ég get ekki nefnt neina fjárhagstölu, þ.e. hvað hvert sveitarfélag á að hafa mikla veltu. Ég get ekki svarað því. Það er hins vegar alveg ljóst að það er ekki skynsemi í því að skipta miðhálendinu varðandi skipulags- og byggingarmál upp á milli 40 sveitarfélaga. Það er engin skynsemi að mínu mati á bak við það og þess vegna get ég ekki stutt þá hugmynd óháð því hvað sveitarfélögin eru mörg sem liggja þar að og óháð því hve margir búa þar.
