Ferill 355. máls. Aðrar útgáfur af skjalinu: Word Perfect.



122. löggjafarþing 1997–98.
Þskj. 542 – 355. mál.


Frumvarp til laga



um breyting á lögum nr. 80/1996, um framhaldsskóla.

(Lagt fyrir Alþingi á 122. löggjafarþingi 1997–98.)



1. gr.

    3. mgr. 11. gr. laganna orðast svo:
    Skólameistari ræður aðstoðarskólameistara til fimm ára í senn, áfangastjóra til allt að fjögurra ára og deildarstjóra til tveggja ára að höfðu samráði við skólanefnd. Hann ræður einnig kennara, námsráðgjafa, starfsfólk skólasafns og aðra starfsmenn skólans að höfðu samráði við skólanefnd.

2. gr.

    Lög þessi öðlast þegar gildi.

Athugasemdir við lagafrumvarp þetta.


    Með frumvarpi þessu er lagt til að heimilað verði að afmarka ráðningartíma aðstoðar stjórnenda í framhaldsskólum. Er það í samræmi við þá skipan sem gilti þar til lög nr. 80/ 1996, um framhaldsskóla, tóku gildi. Sú tilhögun hefur gefist vel og stuðlað að æskilegri endurnýjun starfsfólks í þessum stöðum.
    Frá því að rammalög voru fyrst sett um framhaldsskóla hefur ráðningu aðstoðarstjórnenda verið háttað eins og fram kemur í 1. gr. frumvarpsins. Með nýjum framhaldsskólalögum, nr. 80/1996, var hins vegar horfið frá þeirri tilhögun í ljósi meginreglna nýrra laga um réttindi og skyldur starfsmanna ríkisins, nr. 70/1996 (sjá einkum 41. gr. laganna). Í ljósi þess að störf aðstoðarskólameistara, áfangastjóra og deildarstjóra geta verið afgerandi fyrir þróun skóla starfs er með frumvarpi þessu lagt til að veitt verði ótvíræð lagaheimild til þess að setja sér stök ákvæði um tímabindingu ráðningar aðstoðarstjórnenda í framhaldsskólum.
    Hér eiga sömu sjónarmið við og um ráðningu skólameistara í framhaldsskólum. Í 2. mgr. 11. gr. laga nr. 80/1996, um framhaldsskóla, segir: „Menntamálaráðherra skipar skólameist ara til fimm ára að fenginni tillögu hlutaðeigandi skólanefndar.“ Þetta ákvæði var sett til þess að æskileg endurnýjun ætti sér einnig stað meðal skólameistara framhaldsskóla. Efni frum varpsins felur það í sér að æskileg endurnýjun starfsmanna kemst á í öllum stjórnunarstöðum innan framhaldsskólanna.
    Frumvarpið nýtur stuðnings Hins íslenska kennarafélags, Kennarasambands Íslands og Skólameistarafélags Íslands.
    Í 1. gr. er kveðið á um tímabindingu ráðningar aðstoðarstjórnenda í framhaldsskólum. Störf aðstoðarskólameistara, áfangastjóra og deildarstjóra geta verið afgerandi fyrir þróun skóla starfs. Það er því mikilvægt að hæfileg endurnýjun starfsmanna í þessum stöðum geti átt sér stað og má m.a. benda á þýðingu þess að ráða nýja starfsmenn með nýjar hugmyndir til að gegna þessum störfum.



Fylgiskjal.

Fjármálaráðuneyti,
fjárlagaskrifstofa:

Umsögn um frumvarp til laga um breytingu á lögum
um framhaldsskóla, nr. 80/1996.

    Í frumvarpinu er lagt til að heimilað verði að afmarka ráðningartíma aðstoðarstjórnenda í framhaldsskólum í þeim tilgangi að stuðla að æskilegri endurnýjun starfsfólks í þessum stöðum. Að því er séð verður mun frumvarpið, verði það að lögum, ekki hafa áhrif á útgjöld ríkissjóðs.