Ferill 526. máls. Aðrar útgáfur af skjalinu: Word Perfect.
123. löggjafarþing 1998–99.
Þskj. 1118 — 526. mál.
Nefndarálit
um frv. til l. um breyt. á l. um hollustuhætti og mengunarvarnir, nr. 7/1998.
Frá meiri hluta umhverfisnefndar.
Nefndin hefur fjallað um málið og fengið á sinn fund Ingimar Sigurðsson og Sigríði A. Arnardóttur frá umhverfisráðuneyti. Umsagnir um málið bárust frá Sambandi íslenskra sveitarfélaga og Vinnuveitendasambandi Íslands.
Með frumvarpi þessu er lagt til að sveitarfélögum sé heimilt að setja gjaldskrá fyrir eftirlitsskylda starfsemi sé eftirlitið á vegum sveitarfélaganna sjálfra. Með frumvarpinu er horfið frá því að ráðherra setji hámarksgjaldskrá sem gildi fyrir öll sveitarfélög. Í stað þess er lagt til að gefnar verði út leiðbeinandi reglur um uppbyggingu gjaldskráa sem settar verði á grundvelli 1. gr. frumvarpsins.
Meiri hlutinn leggur til eina breytingu á frumvarpinu. Eðlilegt þykir að fulltrúi atvinnurekenda á eftirlitssvæðinu í heilbrigðisnefndinni hafi fulla aðild að nefndinni og hafi atkvæðisrétt á fundum hennar.
Meiri hlutinn leggur til að tillagan verði samþykkt með svofelldri
BREYTINGU:
1. mgr. 11. gr. laganna orðast svo:
Landið skiptist í eftirlitssvæði og skal heilbrigðisnefnd, kosin eftir hverjar sveitarstjórnarkosningar, starfa á hverju svæði. Í hverri nefnd skulu eiga sæti sex menn, fimm kosnir af hlutaðeigandi sveitarstjórnum, þar af skal einn vera formaður, og einn tilnefndur af samtökum atvinnurekenda á eftirlitssvæðinu. Atkvæði formanns ræður úrslitum ef atkvæði falla jafnt í nefndinni. Náttúruverndarnefndir sveitarfélaga á eftirlitssvæðinu eiga rétt á að tilnefna einn fulltrúa í nefndina til viðbótar en hann hefur ekki atkvæðisrétt við afgreiðslu mála í nefndinni. Sömu reglur gilda um varamenn.
Alþingi, 10. mars 1999.
Ólafur Örn Haraldsson,
form., frsm.
Árni M. Mathiesen.
Kristján Pálsson.
Tómas Ingi Olrich.
Lára Margrét Ragnarsdóttir.
Prentað upp.