Kolbrún Halldórsdóttir (andsvar):
Herra forseti. Ég fullyrði að hér er ekki um neinn misskilning að ræða því að með aðstöðunni sem hefur verið útbúin í dómhúsinu er verið að taka mál frá Barnahúsinu og Barnahúsið er öðruvísi útbúið en herbergið sem um hefur verið rætt í dómhúsinu. Það hefur upp á allt öðruvísi anda að bjóða og sá andi er það sem talað er um að sé ákjósanlegur í þessum viðkvæmu málum en ekki sá andi sem boðið er upp á í yfirheyrsluherbergi í dómhúsinu. Þess vegna fullyrði ég, herra forseti, að ekki er um misskilning að ræða þegar það er fullyrt að herbergið í dómhúsinu taki mál af Barnahúsinu og bjóði þar af leiðandi heim öðruvísi meðferð þessara mála, meðferð sem er ekki jafngóð, jafnvingjarnleg og meðferðin sem möguleg er í Barnahúsi.