Jón Bjarnason:
Herra forseti. Ég kem upp m.a. til þess að leiðrétta hv. þm. Kristin H. Gunnarsson. Það er alls ekki stefna Vinstri hreyfingar -- græns framboðs og hv. þm. Kolbrún Halldórsdóttir hefur aldrei haldið því fram að við værum á móti virkjunum, síður en svo. Við leggjum áherslu á að virkjunarkostum sé forgangsraðað, fundnar séu hagkvæmustu og ódýrustu virkjanirnar til að virkja sem skila Íslendingum okkar notkun, okkar fyrirtækjum, okkar heimilisnotkun, skili þeim orku á ódýru verði, en ekki sé verið að forgangsraða í stórvirkjanir og framleiða orku sem fer á spottprís til erlendra stórfyrirtækja. Þetta vil ég að hv. þm. Kristinn H. Gunnarsson meðtaki í eitt skipti fyrir öll þannig að hann þurfi ekki að vera að koma með svona málflutning í ræðustól. (KHG: Hvar á að virkja?) Ja, t.d. Hvalá í Strandasýslu. Hún væri fín og væri fljót og góð virkjun. (Gripið fram í: 200 megavött.) Ódýr og góð. Hefurðu séð hana? (Gripið fram í: Fljótsdalsvirkjun í smáiðnað.) Ég bara harma það að hv. þm. skuli vera með svona málflutning.
Ég legg áherslu á að það er hörmulegt til þess að vita að íslenskur iðnaður og íslensk fyrirtæki skuli vera látin mæta afgangi þegar verið er að spara orku.